ԱՄՆ-ի նախկին նախագահ Ջիմի Քարթերի ազգային անվտանգության գծով խորհրդատու Զբիգնև Բժեզինսկին համարում է, որ Ռուսաստանն ու ԱՄՆ-ն արդեն վաղուց գտնվում են «սառը պատերազմական» իրավիճակում, սակայն քիչ հավանական է, որ դա կվերածվի «թեժ կոնֆլիկտի»:
«Ես չեմ ցանկանում, որ պատերազմ լինի, բայց չեմ էլ կարող թույլ տալ վախեցնել ինձ այն պնդումով, որ մենք սադրում ենք պատերազմը մեր արձագանքներով: Ոչ, հակառակը, եթե մենք չփորձենք արձագանքել, ապա դա ուղիղ ճանապարհ կլինի դեպի պատերազմը»,- ասել է նա Spiegel-ի հետ հարցազրույցում:
Նա նաև առաջարկել է ուկրաինական ճգնաժամի լուծումը Ֆինլանդիայի օրինակով: Բժեզինսկին կողմ է պաշտպանական զինատեխնիկայի տեղադրմանը Ուկրաինայում այնպես, ինչպես Ֆինլանդիայում, Ռուսաստանին չբորբոքելու համար: