«Բաղրամյան պողոտայում գտնվելը սկզբունքային կլիներ, եթե պահանջները և օրակարգը շատ հստակ լինեին, կարծում եմ՝ հիմա այն վիճակն է, որ և՛ մարտավարությունը, և՛ պահանջները հստակեցնելու կարիք կա, իսկ այդպիսի քննարկում քաղաքացիների հետ կազմակերպելու համար միգուցե Ազատության հրապարակն ավելի հարմար վայր է, և եթե ավելի հստակ և պատրաստ օրակարգ լինի, կարելի է այնտեղից վերադառնալ այստեղ, բայց եթե մարդիկ գտնում են, որ այստեղից հեռանալով հարցի սրությունը կնվազի, միգուցե դա էլ իր հիմքերն ունի,- «Առաջին լրատվական»-ի հետ զրույցում ասաց Երևանի մամուլի ակումբի նախագահ Բորիս Նավասարդյանը՝ անդրադառնալով հարցին, թե որտեղ պետք է շարունակել պայքարը՝ Բաղրամյան պողոտայում, թե Ազատության հրապարակում։
Բորիս Նավասարդյանի խոսքով՝ էական է ոչ թե վայրը, այլ օրակարգի ձևակերպումը, ի՞նչ ենք ուզում և որքանո՞վ է այն իրատեսական և ի՞նչ ենք անում, երբ մեր ուզածը չի ապահովվում։
Հայաստանում քաղաքական դասակարգը, նր խոսքով, այդքան վստահություն չի վայելում հանրության մեջ, որ կարողանա առաջնորդել շարժումը։