Վրաստանի պետական համալսարանի պրոֆեսոր, Էքստրեմալ լրագրության մոսկովյան կենտրոնի հիմնադիր ղեկավար, վերլուծաբան Օլեգ Պանֆիլովի կարծիքով՝ ռուսաստանյան ԶԼՄ-ների մեկնաբանումը Հայաստանում տեղի ունեցող իրադարձությունների հետ կապված պայմանավորված է նրանով, որ Ռուսաստանը վախենում է կորցնել այն բոլոր տարածքները, որոնք իրենն է համարում:
«Առաջին լրատվական»-ի հետ զրույցում Պանֆիլովը կարծիք հայտնեց, որ այն ամենն, ինչ այսօր տեղի է ունենում Հայաստանում և այն, ինչ տեղի է ունեցել հետխորհրդային տարածքում՝ Ռուսաստանն ընդունում է որպես անձնական վիրավորանք. «Կարծում է, որ դրանում մեղավոր է Վաշինգտոնը և չի ուզում ընդունել մեղավորութունն առ այն, որ իր տնտեսական ծրագրերը չեն աշխատում, և իր հարևաններին օգնելու հնարավորություն չունի»:
Նրա խոսքերով՝ այն, ինչ տեղի է ունենում այսօր Երևանի Բաղրամյան պողոտայում՝ Ռուսաստանի կողմից ընկալվում է որպես ազդեցության վերջին վայրի կորուստ. «Կարծում եմ, որ Ռուսաստանը հասկանում է հետևանքների մասին, որովհետև Հայաստանի հետևից կարող են մյուս բոլոր հետխորհրդային երկրները գնալ: Խնդիրը միայն այն չէ, որ Ռուսաստանին դուր է գալիս, որ իրեն անվանում են «մեծ եղբայր», այլ խնդիրն այն է, որ Ռուսաստանը, որպես չկայացած տղամարդ, չի կարողանում բավարարել իր հարևաններին գոնե տնտեսապես, այսինքն՝ Ռուսաստանի հետ ընկերությունից ոչ մի օգուտ չկա: Բացի այդ՝ Հայաստանը հայտնվել է այնպիսի սարսափելի իրավիճակում, երբ Ռուսաստանն ուզում է Երևանից լսել միայն սիրո և բարեկամության խոսքեր, բայց ի պատասխան չի կարողանում ցուցաբերել ո՛չ տնտեսական, ո՛չ աշխարհաքաղաքական օգնություն»,- ասաց մեր զրուցակիցը:
Այնուհետև Պանֆիլովն ընդգծեց. «Ես կարդացի համայն Ռուսիո պատրիարք Կիրիլի ելույթը: Ակնհայտ է, որ դա կայսերապաշտական քաղաքականության արտացոլումն է: Ես նույնիսկ չեմ կարող ասել, թե ինչ աստիճանի հայերը պետք է վիրավորվեն այդ խոսքերից։ Նա կամ ընդհանրապես չի հասկանում ինչ է տեղի ունենում Կովկասում և մասնավորապես Հայաստանում, կամ էլ Հայ առաքելական եկեղեցու պատմությունից է անտեղյակ»:
Նրա խոսքերով՝ Ռուսաստանում հիմա այնպիսի իրավիճակ է, որ վախենում է կորցնել Հայաստանը և միևնույն ժամանակ չգիտի՝ ինչ առաջարկի դրա փոխարեն:
Մեր այն դիտարկմանը, թե ինչպես է Վրաստանին հաջողվում ռուսական ընկերության՝ նույն «Ինտեր ՌԱՕ ԵԷՍ»-ի հետ աշխատել արդյունավետ և առանց կորուստների, և ընդհանրապես՝ ինչպե՞ս Վրաստանին հաջողվեց կտրվել ռուսական լծից, և ինչո՞ւ նույնը չի հաջողվում Հայաստանին, Օլեգ Պանֆիլովն ասաց․ «Ես կարծում եմ, որ հետխորհրդային տարածքում բացի Ուկրաինայից, Վրաստանից և ինչ-որ չափով նաև Մոլդովայից, Հայաստանն ունի բոլոր հնարավորությունները դառնալու ամբողջությամբ ինքնուրույն երկիր: Ես մի անգամ գրել եմ այն 6 գործոնների մասին, որոնք բերում են «գունավոր հեղափոխությունների», որից 5 գործոնները՝ պետականության պատմություն, քաղաքական ավանդություների պատմություն, հասարակական գործունեության մշակույթ, խոսքի ազատություն և այլ գործոններ, Հայաստանն ունի: Հայաստանին չի բավարարում միայն 6-րդ գործոնը՝ դա Կրեմլյան քաղաքականության չհասկացվածությունն է: Հենց որ դուք ասեք, որ Կրեմլը կաթվածահար է անում ձեր բոլոր ձգտումները դեպի ժողովրդավարություն, այդ ժամանակ Հայաստանը կդառնա այնպիսի երկիր, ինչպիսին Ուկրաինան և Վրաստանն է: Բայց քանի դեռ դուք ասում եք, որ Ռուսաստանը ձեր մեծ եղբայրն է, ոչինչ չի ստացվի: Այդ մեծ եղբայրը մշտապես ձեզ սահմանափակումների մեջ է դնելու և կաթվածահար է անելու ձեր երկրի զարգացումը»,- եզրափակեց նա:
