«Նեզավիսիմայա Գազետա» թերթի կայքն անդրադարձել է Երևանում էլեկտրաէներգիայի թանկացման դեմ ցույցի ժամանակ երեկ ցուցարարների նկատմամբ ոստիկանության կողմից ուժի գործադրմանը: Եթե քաղաքական ընդդիմությունը բողոքի դուրս գա, այն իշխանության համար սպառնալի բնույթ կստանա, գրում է կայքը:
Ինչպես հայտնի է դարձել «Նեզավիսիմայա Գազետա»-ին՝ ցուցարարների մեջ զգեստափոխված ուժայիններ են եղել, որոնք ցուցարարներին հրահրել են ավելի ակտիվ գործողությունների՝ առաջարկելով իրավապահների վրա քարեր նետել, նշվում է հոդվածում: Թերթն անդրադարձել է նաև լրագրողների նկատմամբ բռնություններին:
Հայաստանում դա էլեկտրաէներգիայի առաջին թանկացումը չէ, բայց ամենազգալին է: Ընդ որում՝ ինչպես ասում են փորձագետները՝ այն պայմանավորված չէ լուրջ տնտեսական պատճառներով, այլ կապված է կոռուպցիայի հետ: Օգոստոսի 1-ից էլեկտրաէներգիայի սակագնի բարձրացումը կհանգեցնի մուլտիպլիկացիոն ազդեցության և գների բարձրացման կբերի շատ այլ ոլորտներում: Գների այդպիսի բարձրացումը բացասաբար կանդրադառնա բնակչության ոչ հարուստ շերտերի կենսամակարդակի վրա: Իսկ փոխհատուցել կորուստները, ինչպես խոստանում է կառավարությունը, բոլորին չի հաջողվի, քանի որ Հայաստանի յուրաքանչյուր 6-րդ բնակիչ պատկանում է աղքատների դասին, նշվում է հոդվածում:
Պարբերականը հիշեցնում է, որ երբ իշխանությունները փորձեցին բարձրացնել հասարակական տրանսպորտի գինը, «Ոչ թալանին» շարժման ակտիվիստներին հաջողվեց հասնել գնի անփոփոխ մնալուն: «Ըստ ամենայնի, նրանք ուժ են զգացել և որոշել են կրկնել արդյունքը: Առավել ևս, որ ներկայիս ակցիայի մասշտաբն ավելի լուրջ է եղել»,- գրում է կայքը:
Հոդվածում բերվում է Գլոբալիզացիայի և տարածաշրջանային համագործակցության վերլուծական կենտրոնի խորհրդի նախագահ, քաղաքագետ Ստեփան Գրիգորյանի խոսքը: Նա ասել է. «Հայաստանում սպասումներ կային, որ Եվրասիական տնտեսական միությանը (ԵՏՄ) երկրի միանալուց հետո կյանքը կդառնա եթե ոչ ավելի ուրախ, ապա ավելի հեշտ: Ռուսաստանը տնտեսական աջակցություն կցուցաբերի իր տնտեսական գործընկերոջը: Մոտ երկու անգամ էլեկտրաէներգիայի թանկացումը Հայաստանի համար սառը ցնցուղ էր»: Նա նշել է, որ ընդդիմադիրները կարող են հիշեցնել, որ Ռուսաստանը գազի գինը 180 դոլարից նվազեցրել է մինչև 160 դոլար 1 000 խմ-ի դիմաց: Բայց, ինչպես նշել է Գրիգորյանը, 160 դոլար գնով գազը հասնում է միայն մինչև Հայաստանի հետ սահման: Հետո ռուսական «Գազպրոմն» այդ նույն գազը Հայաստանի քաղաքացիներին վաճառում է արդեն 260-280 դոլարով: «Եվ սա միայն մի օրինակ է: Ստացվում է, որ Հայաստանը ԵՏՄ-ին անդամակցությունից ավելի շատ վնասներ ունի, քան օգուտներ: Դա ևս հասարակության համար շոկ էր: Սպասումները չարդարացան…»,- ասել է Գրիգորյանը:
Նրա խոսքով՝ «այսօրվա ակցիան Երևանում ոչ մի կապ չունի քաղաքական ընդդիմության հետ: Նրանք քաղաքացիական ակտիվիստներ են… Բայց եթե ընդդիմությունը բողոքի դուրս գա, այն ավելի մասշտաբային կդառնա»: