Ռուսական Forbes ամսագիրը հրապարակել է Ռուսաստանի ամենահարուստ մարդկանց ցուցակը: Այս անգամ նրանում տեղ են գտել 300 գործարարներ: Այս անգամ Forbes Russia-ի ցուցակում ակ 101 միլիարդատեր` նախորդ տարվա 62-ի փոխարեն: Առաջին հարյուր միլիարդատերերի կարողությունը կազմում է 432 մլրդ դոլար, իսկ 200 գործարարների կարողությունը` 499 մլրդ: Անցած տարի 100 միլիարդատերերն ունեին ընդամենը 297 մլրդ դոլար:
Ռուսաստանի ամենահարուստ մարդ է համարվում Նովոլիպեցկի մետալուրգիական կոմբինատի սեփականատեր Վլադիմիր Լիսինը, որի կարողությունն այս տարի կազմում է 24 մլրդ դոլար` նախորդ տարվա 15.8 մլրդ-ի փոխարեն:
Ռուսաստանի միլիարդատերերի միջին տարիքը կազմում է 49.5: Նրանցից ամենաերիտասարդը 15 տարեկան է, իսկ ամենատարեցը` 78-ը: Հատկանշական է, որ չնայած պետության հետ ունեցած լուրջ խնդիրներին` Մոսկվայի նախկին քաղաքապետ Յուրի Լուժկովի կինը շարունակում է մնալ այդ ցուցակում: Ընդ որում Ելենա բատուրինան միակ ռուս կին միլիարդատերն է: Անցած տարվա համեմատ` Բատուրինայի կարողությունը կրճատվել է 1.7 մլրդ դոլարով` կազմելով 1.2 մլրդ:
Ռուսաստանի ամենահարուստ 200 գործարարների մեջ 4-ը հայեր են: 1.5-ական միլիարդ դոլար ունեն «Ռեսո-Գարանտիա» ապահովագրական ընկերության ղեկավարներ Նիկոլայ և Սերգեյ Սարկիսովները, որոնց նախորդ տարվա կարողությունը կազմում էր 0.95 մլրդ դոլար: Եղբայրները զբաղեցնում են 68-րդ և 69րդ տեղերը համապատասխանաբար: 70-րդ տեղում է ապահովագրական մեկ այլ ընկերության` «Ռոսգոստրախի» հայազգի ղեկավար Դանիիլ Խաչատուրովը, որի կարողությունը նախորդ տարվա համեմատ աճել է 300 մլն դոլարով` կազմելով 1.5 մլրդ:
1.4 մլրդ դոլար կարողությամբ 73-րդ հորիզոնականում «Տաշիր» գրուպի ղեկավար, Սերժ Սարգսյանի աշխատակազմի ղեկավար Կարեն Կարապետյանի եղբայր Սամվել Կարապետյանն է: Նա գրեթե կրկնապատկել է իր կարողությունը. 2010թ.-ին նա ուներ 750 մլն դոլարի կարողություն:
