Որոտանի ՀԷԿ-երի համալիրի վաճառքի անօրինականությունը մշտապես Աժ բարձր ամբիոնից հնչեցնում էր ՀԱԿ խմբակցության պատգամավոր Արամ Մանուկյանը՝ շեշտելով, որ այդ գործարքը առանց Ազգային ժողովի համաձայնության չպետք է կայանա: Չնայած այդ պահանջներին՝ օրերս վարչապետ Հովիկ Աբրահամյանը կնքեց առք ու վաճառքի պայմանագիրը ամերիկյան «Քոնթուր գլոբալ հիդրոկասկադ» ընկերության հետ՝ առանց Ազգային ժողովի համաձայնության:
Ամերիկյան ընկերության հետ շուրջ մեկ տարի առաջ էր պայմանագիր կնքվել Որոտանի կասկադի վաճառքի մասին, ինչը քննադատության արժանացավ, որից հետո կառավարությանը որոշ փոփոխություններ կատարեց պայմանագրում:
Արդեն կայացած գործարքից հետո ի՞նչ է պատրաստվում անել ՀԱԿ-ը: «Առաջին լրատվական»-ի հետ զրույցում թեմային անդրադարձել է ՀԱԿ խմբակցության ղեկավար Լևոն Զուրաբյանը, որը կոռումպացված դատական համակարգի պարագայում քայլեր անելն անիմաստ է համարում: Առայժմ կշարունակեն գնահատականներ հնչեցնել, իսկ իշխանափոխությունից հետո կվերանայեն գործարքը: