«Ազատության» փոխանցմամբ՝ Արարատի մարզի Նոր Կյանք գյուղի միջնակարգ դպրոցի 38 ուսուցիչներից 30-ը հրաժարվում է աշխատել նոր տնօրենի հետ։
Նրանք այսօր դպրոցի փոխարեն եկել էին Երևան՝ Մարդու իրավունքների պաշտպանի գրասենյակ: Պնդում են՝ տնօրեն Արամ Ստեփանյանը ոտնահարում է իրենց իրավունքները, առանց հիմնավորման աշխատանքից հեռացնում է ընդդիմախոսներին, մյուսներին էլ ստիպում է հեռանալ սեփական դիմումի համաձայն:
«Բոլորիս ներկայությամբ ուսումնական գծով տեղակալին ստիպեց, որ դիմում գրի և հրաժարվի՝ պատճառաբանելով, որ ինքը չի աշխատում։ Այնինչ ինքը ընդհանրապես տեղյակ չէ, թե ուսուցիչներն ինչ են անում։ Եթե դպրոցում աշխատել է, ապա ուսմասվարն է աշխատել»,- ասել է ուսուցչուհի Նունե Մարտիրոսյանը։
«Ինքը ծնողական ժողովներին հայտարարում է, որ այս դպրոցի 90 տոկոսին պետք է փոխի, նոր ուսումնական տարին նոր մարդկանցով պիտի սկսի։ Այսինքն մենք էսքան տարի ոչի՞նչ չենք արել այդ դպրոցում»,- ասել է մեկ այլ ուսուցիչ։
Մանկավարժների խոսքով՝ անցած սեպտեմբերին դպրոց եկած տնօրենը աշխատանքի է ընդունում իր մերձավորներին, քարտուղարուհին, օրինակ, կինն է։ Հեռացված փոխտնօրենը պնդում է, որ պաշտոնավարման մեկ տարվա ընթացքում դպրոցի ղեկավարը մանկավարժական խորհրդի նիստ չի հրավիրել, ուսումնական պլան չի կազմել, աշխատավայրում գրեթե չի լինում, եղած ժամանակ էլ աշակերտների, ուսուցիչների հետ անհարգալից, անգամ հայհոյանքներով է խոսում:
«Ասում ենք՝ դասաբաշխում, ասում է՝ ես չեմ հասկանում, դուք երկար տարիների փորձ ունեք գնացեք, դասաբաշխումն արեք։ Ինչ հարցնում ես՝ ասում է չգիտեմ, զանգե՞մ մամային հարցնեմ»։
Ուսուցիչների խոսքով, նոր տնօրենը պարբերաբար նշում է, որ ինքը վարչապետ Հովիկ Աբրահամյանի հովանավորյալն է և վախենալու բան չունի.- «Ասում է՝ իմ դեմ կանգնած ցանկացած պատ ես ձեռքով կհրեմ, իմ դեմ ոչ մեկը չի կարող ոչինչ անել»։
Մանրամասները՝ սկզբնաղբյուր կայքում
