«Հրապարակ» օրաթերթը մայիսի 21-ին հրապարակել է «Հանրությունն ուզում է իմանալ» վերնագրով հոդված, որում գրված է, թե Ռուզաննա Խաչատրյանը, վարելով ընկերոջ մեքենան, վթարի է ենթարկվել, որի հետևանքով մարդ է մահացել։ Սա ակնհայտ սուտ է, զրպարտող նյութ է»,- լրագրողների հետ զրույցում ասաց պաշտպանության նախարար Սեյրան Օհանյանի տիկնոջ՝ Ռուզաննա Խաչատրյանի փաստաբան Կարեն Մեջլումյանը: Նա ասաց, որ դիմել են Կենտրոն և Նորք-Մարաշ վարչական շրջանների ընդհանուր իրավասության դատարան՝ «Հրապարակ» օրաթերթից պահանջելով հերքում տալ և ներողություն խնդրել Ռուզաննա Խաչատրյանին զրպարտելու համար։
Ըստ փաստաբանի՝ հոդվածում նրան մեղադրում են հանցագործության համար: Կարեն Մելջումյանը վստահեցրեց, որ պատասխան են ուղարկել խմբագրությանը, հերքում պահանջել, սակայն ամսի 23-ին արդեն երկրորդ հրապարակումն է եղել, որում գրված է, որ իրենք հղում են արել hzham.am կայքին, ուստի հրապարակումը դիտարկվել է որպես Ռուզաննա Խաչատրյանի պատասխանի հրապարակման մերժում, և մայիսի 25-ին դիմել են դատարան: «Որպեսզի ֆինանսական առումով լրատվամիջոցին նեղը չգցենք, գումար չենք ուզում՝ պահանջում ենք պատասխանը հրապարակել, ներողություն խնդրել»,- նշեց նա:
Ասուլիսին ներկա էր նաև «Հանրությունն ուզում է իմանալ» վերնագրով նյութի հեղինակ Սյուզան Սիմոնյանը, որը հայտնեց, որ իրենք պատասխանը ստացել են թերթում 2-րդ նյութի հրապարակումից հետո, բացի դրանից, ըստ նրա՝ նամակում նշված է եղել, որ պատասխանը պետք է տպագրվի մինչև մայիսի 30-ը, այնինչ ժամկետը չանցած՝ դիմել են դատարան: «Բացի դրանից՝ նյութը եղել է բազմակողմանի, դուք հոդվածը չեք կարդացել, Ռուզաննա Խաչատրյանի տեսակետը ևս ներկայացված է եղել»,- պնդեց լրագրողը՝ ընթերցելով հոդվածի համապատասխան հատվածը:
Ռուզաննա Խաչատրյանի տեսակետը ֆեյսբուքյան գրառման միջոցով է մեջբերված եղել, բայց, այնուամենայնիվ, ներկայացված է եղել: Հոդվածում նաև ի սկզբանե նշված է եղել, որ տիկնոջ վերաբերյալ ասվածները արծածվել են տարբեր լրատվամիջոցներում:
Փաստաբանը իր հերթին նշեց, որ «Հրապարակը» հղում է արել ֆեյք կայքի, որը ստեղծվել է ընդամենը 1.5 ամիս առաջ: «Օրական մի քանի անգամ զրպարտող, վիրավորական և հայհոյախառը նյութ է հրապարակվում Ռուզաննա Խաչատրյանի և նրա ամուսնու մասին, և հոդվածում տարածել եք ֆեյք կայքի գրածները»,- նկատեց նա:
Փաստաբանը նաև ընդգծեց, որ «ֆեյք» կայքում վթարի հետ կապված գրված է, որ 2012թ.-ին Ռուզաննա Խաչատրյանը վարել է գործարար Հովիկ Հայրապետյանի մեքենան, վթար է տեղի ունեցել, և Հովիկ Հայրապետյանը մահացել է։ Դա ակնհայտ սուտ է. «Նման վթար իսկապես տեղի է ունեցել, բայց այդ գործով դատապարտվել է Աննա անունով մի մարդ։ Դատավճիռը եղել է 2013թ. ապրիլին։ Մենք այս կայքի դեմ էլ ենք հայցադիմում պատրաստել և դիմելու ենք դատարան»,- մանրամասնեց փաստաբանը:
Սյուզան Սիմոնյանը կրկին պնդեց, որ հոդվածում հեղինակի կողմից Ռուզաննա Խաչատրյանի արժանապատվությանը դիպչող արտահայտություններ չկան, նաև հարցրեց՝ եթե զրպարտությունը ապաքրեականացված է, ապա ինչո՞ւ է Սեյրան Օհանյանը դիմել նաև գլխավոր դատախազին, գլխավոր դատախազը ի՞նչ կապ ունի:
Փաստաբանը նկատեց, որ դա, հնարավոր է, կապված է հանցավոր տարրերի հետ, բայց չասաց, թե կոնկրետ որ հրապարակման մասով, և արդյոք կապ ունի՞ «Հրապարակ» թերթի հետ:
Սյուզան Սիմոնյանը փաստաբանին վստահեցրեց, որ դատարանում ինքը կապացուցի, որ հենց թերթին են զրպարտում:
Փաստաբանն իր հերթին նկատեց՝ ի՞նչն է խանգարում Ռուզաննա Խաչատրյանի պատասխանը հրապարակելուն. այդ պարագայում իրենք կքննարկեն և գուցե հայցադիմումը հետ վերցնեն:
Մանրամասները՝ տեսանյութում: