Փարիզի դատարանը մեկուկես տարվա ազատազրկման է դատապարտել Զաքիա Մեդկուրին, որն իր նախկին սիրեկանին մեկ տարի պահել է անազատության մեջ և կտտանքների ենթարկել: Այս մասին գրում է Korrespondent.net-ը:
43-ամյա Մեդկուրը 37-ամյա Մաքսիմ Գաժեի հետ ծանոթացել է 2007-ին՝ համացանցի միջոցով, իսկ մի քանի ամիս անց նրանք սկսել են միասին ապրել: Բայց շուտով Մաքսիմը զրկվել է աշխատանքից, իսկ սիրուհին վերցրել է նրա կրեդիտ քարտն ու անձը հաստատող փաստաթուղթը:
Գաժեն դատարանին ասել է, որ սիրուհին ստիպել է իրեն սպունգներ կուլ տալ, խմել պատուհանները լվանալու համար նախատեսված հեղուկը, ինչպես նաև նրա մարմնին հանգցրել է ծխախոտներ:
Զաքիան 25 ք/մ բնակարանում ապրել է երկու երեխաների հետ: Նա Մաքսիմին սպառնացել է՝ եթե վերջինս բողոքի, ապա ինքը նրան մանկապիղծ կհայտարարի: Մաքսիմը ստիպված է եղել քնել մուտքի դռան մոտ՝ հատակին, նրան արգելված է եղել օգտվել զուգարանից:
Դատարանը Մեդկուրին դատապարտել է 18 ամսվա ազատազրկման, ևս 18 ամիս նա պայմանական պատիժ կկրի, ինչպես նաև կվճարի 200 հազար եվրո տուգանք:
Գաժեն հիվանդանոցում է հայտնվել և 8 անգամ վիրահատվել: