ԵԿՄ Կոտայքի մարզի տարածքային կառույցը Աբովյանի քաղաքապետի ընտրությունների պատճառով պառակտվում է: Երկրապահների մի մասը սատարում է Ծառուկյանի թեկնածուին՝ Վահագն Գևորգյանին, մյուս մասը՝ մրցակից Պալաչին՝ Արթուր Հարությունյանին: Այնպես չէ, որ առաջին մասի վերաբերմունքը քաղաքացիական դիրքորոշում է ապագա քաղաքապետի հանդեպ, պարզապես ԵԿՄ նախագահ գեներալ Մանվելն է հակված Ծառուկյանի թեկնածուին ընտրելու:
Թեև վերջինս ընտրության առնչությամբ հրավիրված խորհրդակցության ժամանակ հայտարարել է, թե ընտրության հարցում ազատ են, սակայն իր հակվածությունն արդեն իսկ պետք է ցուցիչ լիներ երկրապահների համար: Բայց ակնհայտ է, որ Մանվել Գրիգորյանի սրտի ցանկությունը ոչ բոլորն են միանշանակ ընդունել, և անկախ իր հակվածությունից՝ կան երկրապահներ, ովքեր բացահայտ հակառակվում են իրենց ղեկավարին ու սատարում իրենց ընկերոջը:
Մանվել Գրիգորյանի առնչությունը այս ընտրություններին, Ծառուկյանի թեկնածուին ուշադրություն չէր գրավի, եթե երեք ամիս առաջ ինքը ԳՄ նիստում հանձն չառներ Գագիկ Ծառուկյանին քննադատելու, վիրավորելու և նրա մականունը Սերժ Սարգսյանի թույլտվությամբ ամբիոնից հոլովելու: Այս հիշեցմանը ի պատասխան՝ նրա մտերիմները պնդում են, որ Վահագնը ավելի շատ Մանվել Գրիգորյանի մարդն է, քան Ծառուկյանի, և հիշեցնում նրա՝ ԵԿՄ-ում ունեցած մտավոր դերակատարման մասին:
Այդպիսի դերակատարման ավելի թարմ օրինակ է Մանվել Գրիգորյանի և Սեյրան Սարոյանի հեղինակած՝ Երկրապահի մասին օրենքը, որի մեջ մեծ ներդրում է ունեցել վերոնշյալ թեկնածուն: Բայց, չգիտես ինչու, այս մասին Գրիգորյանը հրապարակավ չի համարձակվում խոսել, հակառակը՝ ցնցումների մեջ է ընկնում Ծառուկյանի հայրենի քաղաքի ընտրություններում իր ակտիվության մասին հարցից և շաղ տալիս «ոսկեղենիկ» բառապաշարը:
«Առաջին լրատվական»-ը այսօր Սարդարապատում Գրիգորյանից հետաքրքրվեց Աբովյանի ընտրություններում իր ու թիմակիցների ակտիվությունից և դրա հետևանքներից:
Ավելին՝ տեսանյութում։