«Իհարկե, այսօր արտաքին սպառնալիքներից վտանգ կա, բայց մենք ամեն ինչ անում ենք, որ մեր պետությունը անվտանգ լինի, մեր ժողովուրդն անվտանգ լինի: Վտանգը գալիս է մեր թշնամիներից»,- այսօր Սարդարապատում լրագրողների հետ զրույցում ասաց ՀՀ նախագահի գլխավոր ռազմական տեսուչ Միքայել Հարությունյանը:
Վերջինս համոզված է, որ ներքին վտանգ չկա: Եվ անվտանգության հարցերում թե՛ իշխանությունը, թե՛ ընդդիմությունը միասնական են: Մ.Հարությունյանը հավանաբար տեղյակ է, որ վերջին 4-5 տարիներին յուրաքանչյուր տարի Հայաստանից անվերադարձ մեկնում է մոտ 40-50 հազար քաղաքացի. արդյոք սա չի՞ վտանգում մեր երկրի անվտանգությունը: «Ես չէի ցանկանա, որ որևէ հայ այստեղից գնա: Ես եկել եմ Հայաստան: Ես կցանկանայի, որ բոլորը վերադառնան»,- պատասխանեց Մ.Հարությունյանը:
Մ.Հարությունյանը, սակայն, տեղյակ չէ, որ Հայաստանում կան ծայրահեղ հարուստ և ծայրահեղ աղքատ մարդիկ: Որ հարուստ են պաշտոնյաները, աղքատ են շարքային քաղաքացիները: «Ես չգիտեմ, թե որտեղից է ձեր այդ տեղեկությունը»,- արձագանքեց նա: