Արգենտինական ֆուտբոլի լեգենդ Դիեգո Մարադոնան հայտարարել է, որ բավականություն է ստանում ՖԻՖԱ-ում ստեղծված իրավիճակից:
Հիշեցնենք, որ ՖԻՖԱ-ն հայտնվել է կոռուպցիոն խոշոր սկանդալի կենտրոնում: Երեկ Ցյուրիխում ձերբակալվել են կազմակերպության 14 անդամներ, այդ թվում և փոխնախագահներ Ջեֆերի Ուեբն ու Էուխենիո Ֆիգերեդոն:
«Նրանք ինձ խելագար էին անվանում: Այսօր հատուցման ժամն է եկել: Բավականություն եմ ստանում ՖԻՖԱ-ում ստեղծված իրավիճակից: Նրանք ատում են ֆուտբոլն ու նրա թափանցիկությունը: Բավական է խաբել մարդկանց»,- հայտարարել է Մարադոնան:
Ավելի վաղ Մարադոնան բազմիցս քննադատել է ՖԻՖԱ-ին ու նրա նախագահ Զեպ Բլատերին: Օրեր առաջ Մարադոնան հայտարարել էր, որ 79-ամյա Բլատերն իրեն շրջապատել է գողերով ու թալանում է ֆուտբոլը:
