«2.5 տարի անընդհատ ամեն ինչ անում ենք տաքսու վարորդների համար»,- լրագորղների հետ զրույցում ասաց տրանսպորտի և կապի նախարար Գագիկ Բեգլարյանը՝ անդրադառնալով անհատ տաքսու վարորդների բողոքի ակցիաներին և դժգոհություններին:
«Եթե դուք նկատեք, բողոքում են մի քանի փոքր խմբեր: Ես կարող եմ ասել, որ դրանք անձնական հարցեր են, և մոտ ապագայում ես բոլորին ընդունելու եմ, բոլորի առաջարկները դուք բոլորդ եք լսելու, և ինքներդ եք համոզվելու, որ առաջարկները շատ տարբեր են, և հանրության կողմից կան առաջարկներ, որ անընդունելի են»,- ասաց նախարարը:
Մասնավորեցնելով նշված անընդունելի առաջարկները՝ Բեգլարյանն ասաց: «Օրինակ՝ մի խումբն առաջարկում է լրացուցիչ բեռ ավելացնել տաքսու վարորդների վրա, մի խումբն ասում է՝ վերացնենք, մի խումբը, հօգուտ ժողովրդի՝ տաքսիներից օգտվողների է խոսում, մի խումբը՝ այն տաքսիստների համար, որոնք ընդհանրապես ոչինչ չեն ուզում վճարել:
Այս տարաձայնությունը հավաքենք մի տեղ, ներկայացնենք բոլորին, և այն մոտեցումը, որ որոշ մարդիկ գիտեն, որ տաքսու վարորդներն այսօր ունեն խնդիրներ՝ իմանան, որ խնիրների մեջ կան հորինված խնդիրներ, կան իրական և լուծվող-չլուծվող խնդիրներ»,- եզրափակեց նա:
