Այսօր Սարդարապատի հուշահամալիրում լրագրողները էներգետիկայի և բնական պաշարների նախարար Երվանդ Զախարյանից հետաքրքրվեցին երեկվա բազմահազարանոց ակցիայից՝ ընդդեմ էլէներգիայի թանկացման։ Ի՞նչ կարող է ասել նախարարը, որը կհուսադրի ՀՀ քաղաքացուն։
«Բոլոր դեպքերում հոսանքի սակագնի թանկացումը հաճելի չէ ոչ մեկին, և դրանով զբաղվելը բոլորովին ցանկանալի աշխատանք չէ ոչ մեկի համար։ Կան իրավիճակներ, որոնցից ելնելով՝ ուղղակի ստիպված ես լինում ինչ-որ հարցերի լուծում տալ։ Այդ հարցերից մեկն էլ էլէներգիայի սակագնի բարձրացումն է»,- ասաց նախարարը՝ հավելելով, որ հասկանում է խնդրից դժգոհող ցուցարարներին, բոլոր քաղաքացիներին, քանի որ կան սոցիալական հարցեր։
Նա նշեց, որ սակագնի բարձրացման հետ կապված՝ այս պահին կատարվում են ուսումնասիրություններ Հանրային ծառայությունները կարգավորող հանձնաժողովի կողմից ներկայացված հայցերի մասով, և տասը օրից արդյունքները պարզ կլինեն։
Նախարարը նշեց, որ չի կարծում, թե 17 դրամ կթանկանա էլէներգիայի սակագինը. «Վերջնական հայտարարություն կանի հանձնաժողովը, որի իրավասությունների մեջ է»,- ասաց նա։
Նախարարը կո՞ղմ է, թե՞ դեմ խնդրի վերաբերյալ խորհրդարանական լսումներ հրավիրելուն: «Դա խորհրդարանական ուժերը կորոշեն և կկայացնեն համապատասխան որոշում»,- ասաց նա՝ հավելելով, որ իր և բոլորի համար ցանկալի չէ էլէներգիայի սակագնի բարձրացումը և հանրային այսպիսի դժգոհությունը։
Անդրադառնալով ՀԷՑ-ի հնարավոր ազգայնացմանը, նախարարը նշեց, որ այդպիսի խոսակցություններ այս պահին չկան, կան տարբեր խոսակցություններ ՀԷՑ-ի վաճառման հետ կապված։
Ավելին՝ տեսանյութում։