Հայաստանի և Ռուսաստանի արտակարգ իրավիճակների նախարարությունների միջազգային հումանիտար կենտրոնը հայկական Գետարգել գյուղում կարող է բացվել արդեն ընթացիկ տարվա սեպտեմբերին: RIA Novosti-ի հաղորդմամբ՝ այս մասին մամլո ասուլիսի ժամանակ լրագրողներին հայտնել է Ռուսաստանի արտակարգ իրավիճակների նախարարության միջազգային գործունեության դեպարտամենտի ղեկավար Ալեքսանդր Ռոմանովը:
«Ինչ վերաբերում է ռուս-հայկական կենտրոնին՝ պաշտոնական բացումը նախապես ծրագրված է սեպտեմբերին»,- ասել է նա:
Կենտրոնի ստեղծման մասին համաձայնագիրը մայիսի 19-ին ստորագրել են Հայաստանի և Ռուսաստանի արտակարգ իրավիճակների նախարարությունների ղեկավարները: Կենտրոնը հնարավորություն կտա օպերատիվ կերպով արձագանքել արտակարգ իրավիճակներին երկու պետությունների սահմանամերձ տարածքներում, ինչպես նաև երրորդ երկրներում:
Ավելի վաղ Ռուսաստանի արտակարգ իրավիճակների նախարար Վլադիմիր Պուչկովը հայտնել էր, որ կենտրոնի կազմում կընդգրկվեն արձագանքման բոլոր համակարգերը, ներառյալ՝ ավիացիոն տեխնոլոգիաները: Այնտեղ ամեն անհրաժեշտ բան կլինի խոշոր արտակարգ իրավիճակներին արձագանքելու համար, ինչպիսիք են՝ երկրաշարժերը, ջրհեղեղները կամ տեխնածին բնույթի արտակարգ իրավիճակները: