Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ ընթանում է երկու քրեական գործերի դատական քննություն, որոնցով ամբաստանյալի աթոռին նույն երիտասարդն է՝ 29-ամյա Արա Ք.-ն:
Գործերից մեկով ամբաստանյալը միայն Արան է, իսկ մյուս գործով ևս երկու ամբաստանյալներ կան՝ 30-ամյա Ժորա Ղ.-ն և 36-ամյա Արման Մ.-ն:
«Եռյակի» գործով երկու հանցադրվագ խուլիգանության համար է մեղադրանք առաջադրված ամբաստանյալներին:
Մի դրվագում գործել են Արան ու Ժորան, մյուս դրվագում՝ Արան ու Արմանը:
Ըստ մեղադրանքի՝ 2014 թվականի մարտի 2-ի լույս 3-ի գիշերը, գտնվելով ոգելից խմիչք օգտագործած վիճակում, Արան և Ժորան ոստիկանության Մարաշի բաժանմունքում կատարել են խուլիգանություն՝ աղմկել են, խանգարել են բաժանմունքի աշխատանքը, իսկ Արան խուլիգանությունը զուգորդել է գույքի ոչնչացմամբ՝ նա կոտրել է ոստիկանության բաժանմունքի մուտքի դռան ապակին:
Ըստ երկրորդ հանցադրվագով առաջադրված մեղադրանքի՝ Արայի և Արմանի կողմից խուլիգանություն է կատարվել Երևանի Վարդանանց փողոցում գործող «Անգել» կարաոկե ակումբի դիմաց:
2014 թվականի մարտի 7-ի ուշ երեկոյան Արմանը, Արան և վերջինիս ընկերուհին ցանկացել են գնալ «Անգել» կարաոկե ակումբ՝ երեկոն անցկացնելու: Մեքենաներով մոտեցել են ակումբին, բայց ակումբ այդպես էլ չեն մտել, որովհետև վիճաբանություն է սկսվել հենց ակումբի մուտքի մոտ՝ մեքենա կայանելու ժամանակ: Կայանման տեղ չի եղել, տղաները զայրացել են ու հայհոյանքով են խոսել: Այդ ժամանակ մոտակայքում գտնվել է մի ընկերախումբ, որտեղ աղջիկներ են եղել: Այդ ընկերախմբի տղաները հայհոյողներին դիտողություն են արել, ասել են՝ չե՞ք տեսնում, աղջիկներ կան, ինչո՞ւ եք հայհոյում:
Ըստ Արման Մ.-ի, իրենք հայհոյելու ժամանակ աղջիկներին չէին նկատել: Դիտողությունից հետո ընդունել են իրենց սխալը, նույնիսկ ներողություն են խնդրել, ասել են՝ ներող կլինեք, բայց դիտողություն անողների հետ վեճը շարունակվել է: Ըստ մեղադրանքի՝ նրանք գոռգոռացել ու բռնություն են գործադրել դիտողություն արած ընկերախմբի երեք երիտասարդների նկատմամբ. Արան, ըստ մեղադրանքի, հարվածներ է հասցրել երկու հոգու, իսկ Արմանը՝ մեկին: Նրանք չեն ենթարկվել նաև ոստիկանության աշխատողի՝ վիճաբանությունը դադարեցնելու օրինական պահանջներին:
Այնուհետև, ըստ Արմանի, եկել են ոստիկաններն ու իրենց տարել են ոստիկանության բաժին:
Մյուս քրեական գործով Արա Ք.-ն մեղադրվում է ոստիկանության աշխատակցին չենթարկվելու, նրա նկատմամբ բռնություն գործադրելու համար՝ ՀՀ քրեական օրենսգրքի 316 հոդվածի 1-ին մասով:
Ըստ մեղադրանքի՝ 2014 թվականի փետրվարի 17-ին, ժամը 21-ի սահմաններում Արան գտնվել է Վարդանանց փողոցում գործող, վերը արդեն իսկ հիշատակված «Անգել» կարաոկե ակումբում, որի սրահում նա աղմուկ է բարձրացրել, չի ենթարկվել ծառայությունն իրականացնող ոստիկանի պահանջներին ու բռունցքի 3 հարված է հասցրել այդ ոստիկանին՝ շրթունքի շրջանում պատճառելով առողջության թեթև վնասի հատկանիշներ չպարունակող վնասվածք:
Գործի քննության սկզբում մեղադրող դատախազ Տ. Ենոքյանը միջնորդեց այս գործը միացնել նախորդ գործին ու երկու գործերը քննել միատեղ: Սակայն ամբաստանյալ Արա Ք.-ն հայտարարեց, որ այս գործով իրեն առաջադրված մեղադրանքը չի ընդունում և չի ցանկանում, որ երկու գործերը միացվեն:
Դատարանը, կողմերին լսելով, որոշեց հաշվի առնել ամբաստանյալի կարծիքը, նրա արդյունավետ պաշտպանության տեսակետից երկու գործերը չմիացնել, այլ քննել առանձին-առանձին:
Երկու գործերն էլ քննվում են ընդհանուր կարգով:
Կալանքի տակ է միայն երկու քրեական գործերով երեք հանցավոր արարքների համար մեղադրվող Արա Ք.-ն: Մյուս երկու ամբաստանյալներն արգելանքի տակ չեն: