Եվրոպական Միությունը որոշում է կայացրել չեղյալ համարել բոլոր այն տուրքերը, որոնք նախատեսված է Պաղեստինի ինքնավարությունից ներկրվող ապրանքների համար: Այս քայլով ԵՄ-ն փորձում է աջակցություն «ցուցաբերել պաղեստինյան պետականությանը»:
Տուրքերի հանման մասին հայտարարվել է Պաղեստինյան ինքնավարության վարչապետ Սալամ Ֆայադի և միջազգային դոնորների ու ԵՄ նախարարների հետ հանդիպումից հետո: Հանդիպումից հետո ԵՄ արտաքին գերատեսչության ղեկավար Քեթրին Էշթոնը հայտարարել է. «Աջակցությունը պաղեստինյան առևտրի ծայրահեղ կարևոր տարր է պետականության ստեղծման հարցում, տարր, որին ԵՄ-ն աջակցում է թե՛ քաղաքականապես և թե՛ ֆինանսապես»:
Մաքսային տուրքերի վերացման պայմանագիրն ուժ մեջ է մտել անմիջապես: Այն տևելու է 10 տարի և նրա դրույթները տարածվելու են Պաղեստինից ԵՄ ներմուծվող գյուղատնտեսական արտադրանքի, սննդամթերքի և ձկնեղենի վրա: Մրգի ու բանջարեղենի համար տուրքեր կվճարվեն միայն այն դեպքում, եթե դրանք ավելի էժան լինեն Եվրոպայում սահմանված գներից: