Այսօր ՀՅԴ խմբակցությունում տեղի է ունեցել խորհրդարանական քառյակի հերթական հանդիպումը, որի ժամանակ քննարկվել են «Հանրաքվեի մասին» օրենքում լրացումներ կատարելու քառյակի առաջարկները: Քառյակի նիստին ՀՅԴ-ից մասնակցել է Արծվիկ Մինասյանը, ՀԱԿ-ից՝ Լևոն Զուրաբյանը և Սամվել Աբրահամյանը, ԲՀԿ-ից՝ Նաիրա Զոհրաբյանը և «Ժառանգությունից»՝ Ռուբիկ Հակոբյանը:
ՀԱԿ, «Ժառանգություն» և «Բարգավաճ Հայաստան» խմբակցությունների ներկայացուցիչներն առաջարկել են օրենքում ավելացնել դրույթ, ըստ որի հանրաքվեի ամբողջ ընթացքը պետք է տեսանկարահանվի: Իհարկե, օրենքը չի արգելում հանրաքվեի ընթացքի տեսանկարահանում, և 2012թ. խորհրդարանական ընտրությունների ամբողջ ընթացքը տեսանկարահանվեց ԲՀԿ կողմից, սակայն առաջարկի հեղինակները ցանկանում են, որ դա արվի պետության կողմից և պետական միջոցներով: Խորհրդարանական քառյակն առաջարկում է, որ հանրաքվեից հետո հրապարակվի դրա մասնակիցների ցուցակը: Ի դեպ, այս երկու առաջարկները՝ քվեարկության և ձայները հաշվելու ընթացքի տեսանկարահանում և քվեարկության մասնակիցների ցուցակների հրապարակում, խորհրդարանական քառյակը ՕԵԿ-ի հետ ցանկանում է ընդգրկել նաև Ընտրական օրենսգրքում, և հիմա խորհրդարանական այս հինգ խմբակցությունների առաջարկը քննարկվում է ԵԽԽՎ Վենետիկի հանձնաժողովի կողմից:
Խորհրդարանական քառյակը ցանկանում է սահմանափակել ուղեկցող անձանց մասնակցությամբ քվեարկությունը: Ընտրությունների օրը ընտրողների մի մասը ձեռք է բերում այնպիսի հիվանդություններ, որոնք անհնարին են դարձնում նրանց ինքնուրույն քվեարկելու հնարավորությունը: Քառյակն առաջարկում է, որ օրենքում ամրագրվի դրույթ, ըստ որի ուղեկցող անձի հետ կարող են քվեախցիկ մտնել միայն այն անձինք, ովքեր կներկայացնեն հաշմանդամության իրենց գրքույկները կամ բժշկի կողմից տրված տեղեկանք, որ տվյալ անձը չի կարող ինքնուրույն մասնակցել քվեարկությանը:
Ի դեպ, նման տեղեկանք կարող է տրամադրվել նաև լիովին առողջ մարդուն, և հանձնաժողովը ստիպված պետք է լինի հարգել տեղեկանքը, քանի որ դա օրենքի պահանջ է: Այս դեպքում օրենքի այս փոփոխությունը կարող է ոչ թե նպաստել ընտրողներին հավելյալ ճնշումից ազատելուն, այլ նման ճնշման համար օրինական հիմք կապահովի:
Մյուս առաջարկը վերաբերում է հանրաքվեի ժամանակ իրականացվելիք քարոզչությանը, և քառյակն առաջարկում է, որ հանրաքվեի ժամանակ Հանրային հեռուստատեսությունը «այո»-ի և «ոչ»-ի կողմնակիցների համար ապահովի քարոզչության հավասար հնարավորություններ:
Այսպիսով, կարող ենք արձանագրել, որ դեռևս 2013թ. սկզբին ձևավորված խորհրդարանական քառյակը փորձում է վերականգնվել: Այն ժամանակ քառյակի ձևավորումը տեղի ունեցավ կուտակային կենսաթոշակային հիմնադրամների դեմ պայքարի շուրջ: Հետագայում՝ 2014-ին, ՀՅԴ-ն դուրս եկավ քառյակից, քանի որ սահմանադրական փոփոխությունների վերաբերյալ այլ մոտեցում ուներ: Առաջիկայում սպասվող ամենախոշոր և կարևոր հանրաքվեն սահմանադրական փոփոխությունների հանրաքվեն է, և խորհրդարանական քառյակը ցանկանում է օրենքում այնպիսի փոփոխություններ անցկացնել, որ դրանց միջոցով հնարավոր լինի վերահսկելի դարձնել հանրաքվեի ընթացքը:
Դժվար է հավատալ, որ իշխանությունը կհամաձայնվի այս փոփոխություններին, մանավանդ որ՝ Ընտրական օրենսգրքում համանման փոփոխություններ անցկացնելը իշխանությունների կողմից մշտապես մերժվել է: