Այսօր Հանրային խորհրդի Ձեռնարկատիրական և սպառողների իրավունքների հարցերի հանձնաժողովը քննարկում էր կազմակերպել էլեկտրաէներգիայի սակագնի վերանայման վերաբերյալ:
Հանձնաժողովի նախագահ Արշակ Սադոյանը շատ խիստ տոնով հայտարարեց, որ ՀԷՑ-ի դիմումը հիմնավորված չէ: Նա կարդացել էր ՀԷՑ-ի Հանրային ծառայություններ ներկայացրած դիմումի մոտ 54 էջ, ինչը նրան միայն զայրացրել էր: «Դեռ մեկ տարի էլ չի անցել նախորդ թանկացումից, և իրենք ամեն ինչ անում են, որ ինչքան հնարավոր է շատ շահույթ ստանան: Իսկ մեր հանրային ծառայությունները կարգավորող հանձնաժողովը պարզապես նպաստում է դրան: Այնպիսի տպավորություն է, որ հանրային ծառայությունները կարգավորող հանձնաժողովը ծառայում է օտարին, այլ ոչ թե ՀՀ-ին: Եվ ես պահանջում եմ, որ այդ հանձնաժողովի նախագահ Ռոբերտ Նազարյանը հրաժարական տա»,- հայտարարեց Սադոյանը:
Բացի Նազարյանի հրաժարականը, հանձնաժողովի անդամները սահմանեցին, որ թանկացումն անթույլատրելի է և ՀԷՑ-ում պետք է միջազգային կարգի աուդիտ իրականացվի, որը թույլ կտա պրոցեսը ժամանակավոր առկախել:
Հանձնաժողովի մեկ այլ անդամ՝ Աշոտ Աշոտյանն էլ կարծիք հայտնեց, որ Ռոբերտ Նազարյանի փոփոխությամբ հարց չի լուծվի: «Եթե իմանանք, որ խնդիրն այդ է, վաղն էլ կկազմակերպենք, որ նա դուրս գա, բայց հարցն այլ տեղ է: Եթե մի ազգ թույլ է տալիս, որ իր գլխին պոպոկ ջարդեն, ապա երկրորդ անգամ էլ կջարդեն, երրորդ անգամ էլ: Ընդ որում՝ շատ հաջող: ժողովուրդը պետք է այս հարցը լուծի, ընդ որում՝ միանգամից»,- ասաց Աշոտյանը՝ դժգոհությամբ հավելելով, որ հանրային խորհրդի կարծիքը ոչ ոք բանի տեղ չի դնում:
Հանձնաժողովի մեկ այլ անդամ էլ նկատեց, որ պետք է սակագնի վերին շեմ սահմանվի, որ սպառողն իմանա այդ վերին շեմը ինչքն է ու վախ չունենա, որ վաղը նորից հոսանքը կթանկանա:
Առավել մանրամասն՝ տեսանյութում
