Այսօր Էջմիածնի ճանապարհին ԱԺ նախկին պատգամավոր Հակոբ Հակոբյանին պատկանող գազալցակայանում տեղի ունեցած պայթյունից տուժած 3 քաղաքացիների վիճակն առանձնապես չի փոխվել, միայն ցավերն են մեղմացել, վիրակապված են, ու առանձնապես փոփոխություն չկա: Այս մասին «Առաջին լրատվական»-ի հետ զրույցում ասաց այրվածքաբանական հիվանդանոցի այրվածքաբանական բաժանմունքի վարիչ Կարինե Բաբայանը:
Վերջինս նշեց, որ հիվանդներից երկուսին հիվանդանոց են բերել ոչ շտապօգնության մեքենայով: Հիվանդանոցում անմիջապես օգնություն է ցուցաբերվել նրանց:
«Հիվանդներից մեկի՝ Արմեն Ռաֆիկի Հակոբյանի մարմնի գրեթե 80 տոկոսը այրվել է, երկրորդի՝ Արմենի մոտ կա 40 տոկոս այրվածքային մակերես, մյուսի՝ Արթուր Գասպարյանի մոտ՝ 32 տոկոս այրվածքային մակերես: Բոլորի մոտ այրվածքային շոկ էր, շնչուղիների այրվածքներ: Այրվածքները բավականին խորն են: Այս պահին հիվանդները ցավազրկված են, վիրակապված, և սպասում ենք տեսնենք՝ հետագայում ինչպես կլինի նրանց վիճակը»,- ասաց բժիշկ Բաբայանը:
Վերջինիս խոսքով՝ դեռ վիրահատական միջամտություն չի եղել: «Առայժմ հետևում ենք: Եթե հիվանդների մոտ տեղի ունենա կոմպրեսիա, այսինքն՝ մահացած հյուսվածքների սեղմում, ապա անպայման կտրվածքներ կարվեն: Իսկ հետագայում արդեն կդիմենք պլաստիկ միջամտության: Բայց դեռ նրանք պետք է դուրս գան շոկային վիճակից»,- հավելեց բժիշկը:
Բաբայանի խոսքով՝ առավել ծանր է Արմեն Ռաֆիկի Հակոբյանի վիճակը. այրվել են նրա գլուխը, իրանը, վերին ու ստորին վերջույթները: Բավականին խորը այրվածքներ են:
Վերակենդանացման բաժանմունքի մոտ հավաքված Հակոբյանների հարազատները բավական ագրեսիվ էին: Նրանք հրաժարվեցին խոսել և թույլ տալ որևէ նկարահանում:
Հիշեցնենք, որ դեպքը տեղի էր ունեցել Զվարթնոց գյուղի գազալցակայաններից մեկում: Պայթյունի հետևանքով 3 մարդ վիրավորվել է: Նախնական տվյալներով՝ պայթյունն առաջացել է կոմպրեսորային կայանից, ինչի հետևանքով պայթել է Հակոբ Հակոբյանի ազգականներին պատկանող Volkswagen մակնիշի 34 QF 306 համարանիշի ավտոմեքենան:
Առավել մանրամասն՝ տեսանյութում: