ԱՄՆ Տեխաս նահանգի կենտրոնական մասում ջրհեղեղի ժամանակ ջուրը քշել է տունը, որտեղ 13 մարդ է եղել: Նրանցից 12-ը դեռևս համարվում են անհետ կորած: Այս մասին հաղորդում է Associated Press-ը:
Միջադեպը տեղի է ունեցել երկուշաբթի օրը՝ մայիսի 25-ին, Հեյս շրջանում: Ջրհեղեղն իր գագաթնակետին է հասել վաղ առավոտյան: Տունը քշել է Բլանկո գետի ափերից դուրս եկած ջուրը: Կառույցը քանդվել է հիմքից, հետո այն տարել է հոսանքը և շպրտել կամրջին: Առայժմ գտնվել են տան առանձին մասեր, մարդկանց ճակատագիրն անհայտ է մնում:
Տունը գտնվել է զբոսաշրջիկների շրջանում հայտնի Ուիմբերլի Վելի վայրում: Ինչպես հարևան քոթեջները՝ այն ևս իրենից ներկայացրել է մինի հյուրանոց:
Փրկել հաջողվել է տանը եղած ընդամենը մեկ մարդու: Նրա խոսքերով՝ բացի իրենից, այնտեղ եղել է ևս 2 ընտանիք՝ 12 մարդ։