ՀՅԴ Հայաստանի երիտասարդական և «Նիկոլ Աղբալյան» ուսանողական միությունների անդամները կառավարության դիմաց իրականցրին բողոքի ակցիա՝ էլեկտրաէներգիայի թանկացման դեմ՝ կոչ անելով վերջ տալ թալանին: «4-րդ անգամ թանկացնում եք, որ ի՞նչ անեք»,- նշեցին երիտասարդները՝ հորդորելով կառավարությանը կանխել հոսանքի ապօրինի թանկացումը, որը լինելու է ժողովրդի գրպանի հաշվին:
«ՀԷՑ-ի ղեկավարության ճոխությունների համար մենք չենք պատրաստվում վճարել: Նրանք իրենց հարստությունների և ճոխությունների մեջ չեն պատկերացնում, որ Հայաստանում 35 տոկոս աղքատություն կա, և հոսանքի թանկացումը ավելի է աղքատացնելու առանց այն էլ աղքատ հայ ժողովրդին և բերելու է արտագաղթի նոր ալիքի, քայքայելու է մեր պետությունը»,- նկատեց ՀՅԴ «Նիկոլ Աղբալյան» ուսանողական միության անդամ Մեսրոպ Եսայանը:
Երիտասարդները ներկայացրին փաստեր, ըստ որոնց՝ ՀԷՑ-ի ղեկավար պաշտոնյաները վերջին տարիներին ձեռք են բերել թանկարժեք մեքենաներ ու տներ:
Ակցիայի մասնակիցներին մոտեցավ կառավարության քաղաքացիների ընդունելության և դիմումների քննարկման վարչության պետ Ալեքսանդր Ղազարյանը: Ակցիայի մասնակիցները նրանից նախ հետաքրքրվեցին, թե ե՞րբ են վերջ տալու թալանին, և կառավարությունը ե՞րբ է քայլեր ձեռնարկելու ՀԷՑ-ում տիրող իրավիճակին, գողությանը, որի մասին Երվանդ Զախարյանն էլ էր խոսել:
Ալեքսանդր Ղազարյանը խոստացավ դիմումը հանձնել և նշեց, որ կառավարությունը 10-նակի ավելի չի ուզում, որ հոսանքը թանկանա:
Ակցիայի մասնակիցները երթով շարժվեցին Հանրային ծառայությունները կարգավորող հանձնաժողովի շենք:
Մանրամասները՝ տեսանյութում: