Ադրբեջանը ԵՄ-ից սպասում է երկրի «օկուպացված տարածքների» ազատագրմանն առնչվող ՄԱԿ-ի ԱԽ բանաձևերի խիստ պահպանում և, միանշանակ, վճռական քայլեր՝ դրանց իրագործումն ապահովելու համար։ Այս մասին ասվում է Ադրբեջանի ԱԳՆ հայտարարությունում՝ կապված Ռիգայում մայիսի 21-22-ը տեղի ունեցած «Արևելյան գործընկերության» ԵՄ ծրագրի մասնակից երկրների գագաթնաժողովի ամփոփիչ հռչակագրի հետ։ Այս մասին փոխանցում է Trend գործակալությունը։
ԱԳՆ մամլո ծառայությունում հայտնել են, որ հայտարարությունն ուղարկվել է Եվրամիություն։
Ադրբեջանը նշում է եվրոպացի գործընկերների փորձերը՝ այդ հռչակագրի միջոցով լիովին ընդգրկելու Արևելյան գործընկերության օրակարգի հարցերը։
«Ադրբեջանը, սակայն, ընդգծում է, որ որոշ հարցեր չեն կարող փոխզիջման թեմա լինել։ Այսպիսով՝ ԵՄ Արևելյան գործընկերության ծրագրի մասնակից մի շարք երկրներ բախվում են զինված հակամարտությունների տարածքային հավակնությունների, որոնք հանգեցնում են ռազմական օկուպացման, էթնիկ զտման և հարազատ վայրերից բնակչության բռնի արտաքսման։ Այդ հակամարտություններն ուղեկցվում են հիմնարար նորմերի և միջազգային իրավունքների սկզբունքների կոպիտ խախտմամբ, մասնավորապես՝ ինքնիշխանության, տարածքային ամբողջականության, միջազգային մակարդակով ճանաչված սահմանների խախտմամբ։ Այդ սկզբունքները միջազգային անվտանգության համակարգի և գլոբալ եվրամայրցամաքային մակարդակով պետական հարաբերությունների հիմքն են կազմում»,- ասվում է հայտարարությունում։
Հաշվի առնելով, որ ԵՄ-ն աջակցում է բոլոր գործընկեր պետությունների ինքնիշխանությանն ու տարածքային ամբողջականությանը, Ադրբեջանը չի կարող չնշել այդ սկզբունքների անձեռնմխելիության վրա ստվեր գցելու փորձերը՝ ասվում է փաստաթղթում։
Հռչակագրի նախագծի հեղինակները, փորձելով նախապատրաստել հակամարտություններին առնչվող փոխզիջումային տեքստ, չեն կարողացել չշրջանցել պահը, որը միջազգային պրակտիկայում անվանում է երկակի ստանդատ։
«Ադրբեջանն ակնկալում է, որ ԵՄ-ն կարտահայտի հստակ և միանշանակ դիրքորոշում ԼՂ հայ-ադրբեջանական հակամարտության վերաբերյալ։ Այդ հակամարտության կարգավորման հիմքում ընկած են ՄԱԿ ԱԽ № 822 (1993), 853 (1993), 874 (1993) և 884 (1993) բանաձևերը, որոնք ևս մեկ անգամ հաստատում են Ադրբեջանի ինքնիշխանությունն ու տարածքային ամբողջականությունը, միջազգային մակարդակով ճանաչված նրա սահմանների անձեռնմխելիությունը, և պահանջում հայկական զորքերի անհապաղ, լիարժեք և անվերապահ դուրսբերումը ադրբեջանական օկուպացված բոլոր տարածքներից։ Ադրբեջանը ԵՄ-ից ակնկալում է այդ բանաձևերի լուրջ պահպանում և միանշանակ ու վճական քայլերի ընդունում՝ դրանց իրագործման համար»,- ընդգծվում է հայտարարությունում։
