Եվրոպայի օրվա տոնակատարությունների շրջանակում մայիսի 24-ին Երևանի Հյուսիսային պողոտայում բացվել է տեղեկատվական ցուցահանդես: Իրադարձության մասնակիցները հնարավորություն են ստացել ծանոթանալու ԵՄ օժանդակությամբ իրականացվող բազմաթիվ ծրագրերին, որոնք իրականացվում են տարաբնույթ ոլորտներում:
Տեղեկատվական ցուցահանդեսի բացմանը մասնակցել են Հայաստանում ԵՄ պատվիրակության ղեկավար, դեսպան Տրայան Հրիսթեան և ԵՄ անդամ երկրների դեսպանները, որոնք շրջել են տաղավարներով և ծանոթացել իրականացրած աշխատանքներին:
Հայաստանում ԵՄ պատվիրակության ղեկավար, դեսպան Տրայան Հրիսթեան ողջունել է տեղեկատվական ցուցահանդեսի մասնակիցներին:
«1950 թվականի մայիսի 9-ին Ռոբերտ Շումանը կոչ արեց Եվրոպային միավորվել, որպեսզի մայրցամաքում պատերազմ այլևս հնարավոր չլինի պատկերացնել, և հորդորեց տարածել խաղաղություն և բարեկեցություն: Եվրոպայի օրը սքանչելի առիթ է տոնելու այն, թե ինչպես ենք ԵՄ-ում հաղթահարել դարավոր տարբերությունները, և հիմա միասին կերտում ենք ապագան և տոնում մեր հարևանների հետ համագործակցությունը»,- «Արմենպրես»-ի փոխանցմամբ՝ նշել է Տրայան Հրիսթեան:
Նա ընդգծել է, որ այս տարի Եվրոպայի օրվա տոնակատարություններն անցկացվում են «Մեր աշխարհը, մեր արժանապատվությունը, մեր ապագան» կարգախոսի ներքո:
«Հենց նոր Ռիգայում ավարտվեց արևելյան գործընկերության գագաթնաժողովը, որը վերահաստատեց մեր շարունակական հետաքրքրությունը հարևանների հետ ամուր գործընկերություն հաստատելու հարցում, օժանդակելու նրանց հասնել հարատև խաղաղության, քաղաքական կայունության և բարգավաճման»,-նշել է նա: Տրայան Հրիսթեան կարևորել է Հայաստանի հետ համագործակցությունը:
Էկոնոմիկայի նախարարի տեղակալ Գարեգին Մելքոնյանն ընդգծել է, որ միջոցառման նպատակն է ներկայացնել ԵՄ-ի կողմից ֆինանսավորվող ծրագրերը:
«Ընդհանուր առմամբ՝ ցուցահանդեսը նպատակ ունի բարձրացնել տեղեկացվածության մակարդակը, որպեսզի հասարակությունը տեղյակ լինի, թե Եվրոպական միության աջակցությամբ ու օժանդակությամբ Հայաստանում ինչ ծրագրեր են իրականացվում: Ծրագրերը ոչ միայն բարեփոխումներին նպաստելու նպատակ ունեն, այլև դրական ազդեցություն են ունենում Հայաստան-ԵՄ հարաբերությունների զարգացման վրա»,-նշել է նա:
Եվրոպայի օրվա տոնակատարությունները Երևանում կամփոփվեն բացօթյա համերգով, որը տեղի կունենա Ազատության հրապարակում մայիսի 24-ի երեկոյան: Ելույթ կունենան երաժիշտներ ինչպես Հայաստանից, այնպես էլ Բելգիայից և Գերմանիայից: Երեկոյի գլխավոր հյուրը կլինի հայտնի երգիչ Դենզելը:
Եվրոպայի օրվան նվիրված միջոցառումներն այս տարի մեկնարկել են մայիսի 16-ին Վանաձորում: Այնուհետև միջոցառումներ են անցկացվել Գյումրիում և Երևանում:
«Եվրոպայի օրը»` դրոշի, օրհներգի և միասնական արժույթի հետ միասին դարձել է Եվրոպական Միության խորհրդանիշներից մեկը: 1950 թվականի մայիսի 9-ին Ֆրանսիայի արտգործնախարար Ռոբերտ Շումանը կոչ արեց վերջ դնել Ֆրանսիայի և Գերմանիայի միջև երկարատև մրցակցությանը և առաջարկեց ստեղծել Եվրոպայի քաղաքական կազմակերպման մի նոր բանաձև, որը կերաշխավորեր խաղաղություն ամբողջ Եվրոպայում: 1985-ին ԵՄ առաջնորդների` Միլանում կայացած գագաթնաժողովում որոշում ընդունվեց մայիսի 9-ը նշել որպես «Եվրոպայի օր»:
