«Եթե դուք վիճակագրությունը մանրամասնորեն դիտարկեք, ապա կտեսնեք, որ անկախ այն հանգամանքից, թե մեր երկրները միացել են Եվրասիական տնտեսական միությանը, թե ոչ՝ ազդեցությունը տարածաշրջանում կա բոլոր երկրների՝ Վրաստանի, Ուկրաինայի վրա, որովհետև զարգացումները բազմազան ու բազմաթիվ են»,- մեզ հետ զրույցում երեկ ասաց փոխվարչապետ Վաչե Գաբրիելյանը՝ անդրադառնալով ԵՏՄ-ին անդամակցելուց հետո Հայաստանում ստեղծված տնտեսական ծանր վիճակին:
Հիշեցնենք, որ Հայաստանը պաշտոնապես այդ կառույցին անդամակցել է այս տարվա հունվարի 2-ին: Իսկ այս տարվա առաջին եռամսյակի տվյալներով՝ մեր երկրից արտահանումը կրճատվել է մոտ 23 տոկոսով, իսկ ներմուծումը՝ ավելի քան 30 տոկոսով: ԵՏՄ-ում դոմինանտ Ռուսաստանում տնտեսական ճգնաժամ է ստեղծվել, քանի որ Ամերիկան ու եվրոպական մի շարք երկրներ ֆինանսատնտեսական պատժամիջոցներ են սահմանել այդ երկրի նկատմամբ Ուկրաինայի հանդեպ վարած քաղաքականության պատճառով: Եվ Ռուսաստանի տնտեսական ճգնաժամը շղթայական ճգնաժամ է առաջացրել նաև Հայաստանում:
Իսկ Վ. Գաբրիելյանը հավելեց, որ այդ նույն եռամսյակի տվյալներով՝ ՀՀ տնտեսությունը գրանցել է 2,5 տոկոս ակտիվության աճ, որը, նրա խոսքերով, հավասարազոր է 2 տոկոս տնտեսական աճին: «Եթե մենք այդ տրամաբանությամբ ենք նայում՝ եղած շոկերի ներքո, ապա մեր տնտեսությունը ցույց է տվել իր դիմադրողականությունը ու բավականին լավ ցուցանիշներ ունի»,- ասաց նա:
Մեր այն դիտարկմանը, թե չէ՞ որ միջազգային կառույցները, մասնավորապես ՎԶԵԲ-ը Հայաստանում այս տարվա համար տնտեսական անկում են կանխատեսում, Վաչե Գաբրիելյանն այսպես պատասխանեց. «Դրանք տարբեր ցուցանիշներ են, որոնք արված են տարբեր ժամանակներում: Եվ եթե դուք վերցնեք հատկապես Ռուսաստանի վերաբերյալ գնահատականները, որից ածանցվում են տարածաշրջանային մնացած գնահատականները, և որոնց վրա Ռուսաստանի տնտեսությունը մեծ ազդեցություն ունի, ապա կտեսնեք, որ դրանք երեք-չորս ամիս առաջ և հիմա՝ էապես տարբեր են: Ասում էին, թե մինչև 5.5 տոկոս անկում է լինելու, հիմա պարզ է, որ նվազումն այդ չափով չէ: Հետևաբար նույն բաներն ածանցվել են այստեղ շատ ավելի մեղմ դիրքորոշումներով: Ինչ վերաբերում է առևտրաշրջանառությանը, ապա կա ԵՏՄ-ի ոչ ամբողջական վիճակագրություն, որը կամբողջացվի, և պատկերը կհստակեցվի»:
Մեր հարցին՝ փոխվարչապետը բացառո՞ւմ է, որ այս տարի Հայաստանում տնտեսական անկում կարող է լինել, մեր զրուցակիցը պատասխանեց, որ իրենց գնահատականներն այլ են: «Մեր գնահատականն այն է, որ այս տարի տնտեսական անկում չի կարող լինել: Կառավարությունն այժմ քննարկում է առանց տնտեսական անկման սցենար: Ես որևէ բան երբեք չեմ բացառում, բայց մեր գնահատականն է՝ այս տարի տնտեսական աճը ցածր է, բայց հնարավոր է»:
Հայտնի է, որ Հայաստանի էլեկտրական ցանցեր ընկերությունը էլեկտրաէներգիայի սակագինը բարձրացնելու հայտ է ներկայացրել Հանրային ծառայությունները կարգավորող հանձնաժողով, և առաջիկա ամիսներին ամենայն հավանականությամբ էլեկտրաէներգիան կթանկանա: Վ. Գաբրիելյանը չցանկացավ պատասխանել, թե այդ թանկացումը բացասական ինչ հետևանք կթողնի մեր երկրի տնտեսության վրա: «Երբ այդ որոշումը կընդունվի, այդ ժամանակ արդեն ավելի կոնկրետ գնահատականներ կտրվեն»,- ասաց նա:
Վերջինս չհամաձայնեց նաև մեր այն դիտարկմանը, թե բարեխիղճ սպառողն ինչու պետք է մարի ՀԷՑ-ի անբարեխիղճ պարտքը: «Դուք արդեն դատել եք, որ դրանք անբարեխիղճ պարտքե՞ր են, վերլուծել, լսումներին մասնակցե՞լ եք: Ես նման դատողություն դեռևս չեմ կարող անել»:
