«Չափահաս տղա է, ինքն է որոշել մասնակցել ընտրություններին և մասնակցում է, ի՞նչ խնդիր կա, ինչո՞ւ եք ինտրիգ փնտրում ամեն տեղ»,- «Առաջին լրատվական»-ի հետ զրույցում ասաց «Վեդի Ալկո» ընկերության սեփականատեր Մանվել Ղազարյանը ՝ անդրադառնալով Աբովյանի քաղաքապետի ընտրություններում իր մորաքրոջ որդու՝ Արթուր Գեղամի Հարությունյանի՝ առաջադրվելու փաստին:
Մեր հարցին՝ ճի՞շտ են տեղեկությունները, որ իր միջոցով են զարմիկին համոզել առաջադրվել Աբովյանի քաղաքապետի ընտրություններում ընդդեմ Արթուր Հարությունյանի (Պալաչ), Ղազարյանն արձագանքեց. «Ես կրկնում եմ, ինքը՝ Արթուրը, չափահաս մարդ է, ու ինքն է որոշում իր քայլերը: Ես նրա որոշում կայացնելու ժամանակ անգամ Հայաստանում չեմ եղել»։ Գործարարը, սակայն, չպատասխանեց հարցին, թե այդ դեպքում ինչու է իր զարմիկը խուսափում հանրության՝ աբովյանցիների, լրագրողների հետ շփումից: Մինչ օրս նրան ոչ ոք դեռ չի տեսել: Միայն հայտնի է, որ գյուղերից մեկում հոր հետ անասնապահությամբ է զբաղվում:
Հիշեցնենք, որ հունիսի 7-ին Աբովյան քաղաքում քաղաքապետի ընտրություններ են: Առաջադրվել է 6 թեկնածու, որոնցից մեկը՝ Արթուր Գեղամի Հարությունյան անուն-ազգանունով «Վեդի Ալկո» ընկերության սեփականատեր Մանվել Ղազարյանի մորաքրոջ որդին է, որին Գագիկ Ծառուկյանը և իր թիմը առաջադրել են, որպեսզի ընտրողների մոտ առաջացրած շփոթության արդյունքում փոշիացնեն մյուս թեկնածուի՝ Արթուր Գեղամի Հարությունյանի (Պալաչ) ձայները:
Լուսանկարը՝ PanARMENIAN Photo-ի
