«Մենք ցանկանում ենք մեր աբխազ եղբայրների հետ ապրել խաղաղ և փոխադարձ հարգանքի ու սիրո մթնոլորտում»,- լրագրողներին հայտնել է Վրաստանի վարչապետ Իրակլի Ղարիբաշվիլին Թբիլիսիի Ազգագրական թանգարանում, որտեղ նշվում է ժողովրդական տոնը՝ Աբխազիայի օրը։ Այս մասին հայտնում է «Գրուզիա օնլայն»-ը:
Իրակլի Ղարիբաշվիլին տոնի կապակցությամբ շնորհավորել է աբխազներին և մեկ անգամ ևս դիմել նրանց.
«Ցանկանում եմ շնորհավորել բոլորին այս տոնի կապակցությամբ: Այսօր «Աբխազետոբա»-ն է: Ես կցանկանայի, որ այս օրը մենք բոլորս միասին նշեինք Աբխազիայում, Սուխումում։ Ցանկանում եմ ասել, որ մենք շատ ենք սիրում մեր աբխազ քույրերին և եղբայրներին»,- ասել է Ղարիբաշվիլին:
«Մեզ համար Աբխազիան շատ մեծ ցավ է: Ցանկացած վրացու համար այն չսպիացող վերք է: Քանի դեռ տարածքային ամբողջականությունը չի վերականգնվել, վրացիները չեն կարող երջանիկ լինել, ինչպես չեն կարող երջանիկ լինել աբխազներն ու օսերը: Դա ճշմարտություն է, որը պետք է հասու լինի բոլորին»,- հավելել է Ղարիբաշվիլին: