Վրաստանում իշխող «Վրացական երազանք» կոալիցիայի պատգամավորների նախաձեռնած օրենսդրական փոփոխությունները ընդունվելու դեպքում Վրաստանի Ազգային բանկը կզրկվի ֆինանսական վերահսկման գործառույթից: Ուստի երկրի նախագահ Գեորգի Մարգվելաշվիլիի աշխատակազմը այն քննադատության է ենթարկել՝ դա համարելով «քաղաքական որոշում», որը սպառնում է վնասել երկրի տնտեսությունը։ Այս մասին գրում է «Գրուզիա օնլայն»-ը: Այդ օրենսդրական փաթեթը երկրի խորհրդարանի կողմից գրանցվել է մայիսի 21-ին։
Մայիսի 22-ին տեղի ունեցած մամլո ասուլիսի ժամանակ նախագահի աշխատակազմի ղեկավարի տեղակալ, տնտեսական հարցերով նախագահի խորհրդական Գեորգի Աբաշիշվիլին հայտարարել է, որ տնտեսությունը պետք է ազատ լինի քաղաքական որոշումներից և ազդեցությունից:
«Բանկային համակարգի վերաբերյալ որոշ փոփոխություններով մենք այսօր կարող ենք այդ համակարգը ցնցող լուրջ նախանշաններ ստեղծել: Եթե որևէ մեկը ցանկանում է տնտեսական բարեփոխումներ իրականացնել՝ ինչու է սկսում է այն ոլորտից, որը տվյալ պահին բարեփոխումների կարիք չունի: Ինչու ենք պատրաստվում բուժել այն ոլորտը, որը դրա կարիքը չունի: Մենք կարող ենք տնտեսական բարեփոխումներ իրականացնել այլ ուղղությամբ, եթե դրա կամքը կա:
Ելնելով դրանից՝ մենք կարծում ենք, որ դա քաղաքական որոշում է և, համապատասխանաբար, կարծում ենք, որ տնտեսությունը պետք է ազատ լինի քաղաքական որոշումներից: Քաղաքական խաղերը տնտեսության մեջ անթույլատրելի են, դրանք վնասում են տնտեսությունը: Նման որոշումները կվնասեն քաղաքական կայունությանը, որը զգալիորեն արտահայտվում է բիզնես-միջավայրում»,- հայտարարել է նախագահի խորհրդականը: