Շվեյցարիայում անցկացվում է հետաքննություն ԴԱԻՇ («Իրաքի և Շամի իսլամական պետություն») ահաբեկչական կազմակերպության ենթադրյալ անդամի նկատմամբ, որը, հավանաբար, ահաբեկչություն էր պատրաստել Գերմանիայի նախագահ Յոահիմ Գաուկի դեմ: Այս մասին հաղորդում է Berliner Morgenpost պարբերականը:
Իրաքի քաղաքացի ենթադրյալ իսլամիստը 2014-ի մարտի 21-ից ի վեր Շվեյցարիայում գտնվում է նախնական կալանքի խցում:
Կալանքին հետևող խուզարկության ժամանակ հայտնաբերվել է նրան պատկանող բջջային հեռախոսը, որի քարտեզագրման ծառայությունում նշված է եղել 6 վայր. 3-ը՝ Սիրիայի տարածքում, որտեղ նախկինում ահաբեկչություններ են իրականացվել, ևս 3-ը՝ Գերմանիայի տարածքում: Մասնավորապես, քարտեզի վրա նշված է եղել Բելվյու ամրոցը՝ Գաուկի բեռլինյան նստավայրը:
Հենց դա էլ թերթերին հիմք է տվել ենթադրելու պետության ղեկավարի դեմ հնարավոր ահաբեկչության մասին: