Արևելյան գործընկերության հարցերում մենք պետք է լինենք պրագմատիկ և իրատես, ընդ որում՝ բարեփոխումների իրագործման ճանապարհին կանգ չառնենք, այլ նպատակասլաց կերպով առաջ շարժվենք՝ վստահ է Վրաստանի վարչապետը։
Ինչպես հայտնել է Իրակլի Ղարիբաշվիլին վրացական ԶԼՄ-ներին՝ «Ռիգայի գագաթնաժողովում Վրաստանը ստացել է առավելագույնը, այն ամենը, ինչ հնարավոր էր այս իրավիճակում»:
Նրա խոսքերով՝ «սպասելիքները գուցե ավելի մեծ էին, սակայն մենք պետք է իրատես լինենք։ Մեր կառավարությունն արեց առավելագույնը։ Այդ գործընթացը պետք էր սկսել 2010թ.-ից: Հենց այդ պատճառով էլ Մոլդովան ստացավ առանց վիզայի ռեժիմ: Իսկ մենք այդ ուղղությամբ սկսել ենք աշխատել միայն 2 տարի առաջ»:
Ուրբաթ օրը հրապարակվել է «Արևելյան գործընկերության» գագաթնաժողովի եզրափակիչ հռչակագիրը, որում Ուկրաինայի և Վրաստանի համար չի նախատեսվում առանց վիզայի ռեժիմ:
Լատվիայի վարչապետ Լայմդոտ Ստրաույումի խոսքով՝ Վրաստանը և Ուկրաինան ԵՄ-ի հետ առանց վիզայի ռեժիմ կկարողանան ստանալ 2016 թվականին, եթե Եվրամիությունը 2015թ. վերջում այդ հարցի վերաբերյալ դրական զեկույց ներկայացնի:
