SmartUp ընկերության աշխատակիցները հայտնաբերել են Google ընկերության խաղալիքի պատենտավորման հայտ, որը կկարողանա վերահսկել տան բոլոր էլեկտրոնային սարքերը՝ փոխանցելով մարդուց ստացված հրամանները: Այս մասին հայտնում է BBC-ն:
ԱՄՆ պատենտների և ապրանքանիշների գերատեսչության կայքում հրապարակված փաստաթղթերի համաձայն՝ խաղալիքները կունենան բարձրախոս, մարտկոց, տեսախցիկ, Wi-Fi-ի միացման հնարավորություն, դրանք գլուխը կշրջեն տիրոջ կողմը, կլսեն նրա հրամանը և հեռահար կերպով այն կփոխանցեն անհրաժեշտ սարքին:
Պատենտավորման հայտը, որը տրվել է 2012թ., SmartUp ընկերությունը վերջերս է հայտնաբերել:
Հաղորդվում է, որ Google ընկերության ներկայացուցիչը չի կարողացել պատասխանել՝ արդյոք այդ նախագիծը կիրագործվի՞: Նա նշել է, որ ընկերության աշխատակիցների շատ նախագծեր պատենտավորվում են, բայց դա դեռ չի նշանակում, որ դրանք բոլորը կյանքի կկոչվեն: