Ամերիկացի ինժեներներն իրագործել են «Առաքելությունն անհնարին է» ֆիլմի և այլ նմանատիպ ֆիլմերի սցենարիստների մտահղացումը՝ ստեղծելով էլեկտրոնիկա, որը ռադիոազդանշան ստանալու դեպքում ամբողջովին վերացնում է ինքն իրեն՝ տաքանալով մինչև բարձր ջերմաստիճաններ, հայտնել է Իլինոյսի համալսարանի մամլո գործակալությունը:
Լրտեսական էլեկտրոնիկայի գաղտնիքը նրա մետաղական բաղադրիչների կառուցվածքի մեջ է, որոնցով անցնում է էլեկտրական հոսանքը և ինֆորմացիան: Ամենաարագ տարբերակներում սարքն ամբողջովին վերանում է ընդամենը 20 վայրկյանում, իսկ դանդաղ տարբերակներում՝ մինչև մի քանի րոպեում:
Այդ ինքնաոչնչացման ռեժիմը ղեկավարելու համար գիտնականները ստեղծել են ևս մեկ բաղադրիչ մաս՝ հատուկ ռադիոընդունիչ, որը ռադիոալիքները փոխակերպում է էլեկտրականի, որն էլ տաքացնում է սարքը ազդանշան ստանալու դեպքում:
Այսպիսի գյուտը անկասկած կգրավի ռազմական գործիչների ուշադրությունը: Ինչպես անցած տարվա փետրվարին գրել է Discovery ամսագիրը, ԱՄՆ-ի բանակը վաղուց հետաքրքրված է այդպիսի էլեկտրոնային սարքի ստեղծման մեջ, որպեսզի պաշտպանի իրենց անօդաչու սարքերը թշնամու ձեռքն ընկնելուց: