«Արևելյան գործընկերության» երկրներին ոչ ոք երաշխիք չի տվել ավտոմատ կերպով անդամակցելու ԵՄ-ին, դա տևական գործընթաց է։ Այս մասին հայտարարել է Եվրախորհրդի ղեկավար Դոնալդ Տուսկը Ռիգայի գագաթնաժողովի արդյունքներով։
«Մենք պահպանում ենք կուրսը։ Սակայն ոչ ոք չի խոստացել, որ «Արևելյան գործընկերությունը» կլինի ավտոմատ ուղի դեպի ԵՄ անդամակցություն»,- ասել է Տուսկը՝ լրագրողների խնդրանքով մեկնաբանելով ամփոփիչ հայտարարության մեջ «եվրոպական հեռանկար» արտահայտության բացակայությունը։
Նրա խոսքով՝ ԵՄ որոշումները չեն կարող համապատասխանել գործընկեր երկրների բոլոր սպասումներին։ «Դուք կարող եք հասկանալ տարբերությունը մեր խոստումների և մեր գործընկերների սպասումների միջև»,- հայտարարել է Եվրախորհրդի նախագահը։ Նա նշել է, որ գագաթնաժողովին «տեղի է ունեցել շատ բարդ քննարկում ձևակերպումների մասին»։