ԱՄՆ նախագահ Բարաք Օբաման հայտարարել է, որ ներկայացրել է նախագիծ, որով նախատեսվում է առաջիկա 12 տարիների ընթացքում կրճատել բյուջետային ծախսերը 4 տրլն դոլարով: Միջոցառումները, որոնք անհրաժեշտ է իրականացրել ծախսերը կրճատելու համար, Օբաման ներկայացրել է Ջորջ Վաշինգտոնի համալսարանում: Այս մասին հաղորդում է Associated Press գործակալությունը:
«Մենք պետք է ապրենք՝ ըստ մեր ստացած եկամուտների, կրճատենք բյուջեն և վերադառնանք այն ուղուն, որը թույլ կտա մեզ վճարել պարտքերը: Եվ մենք պետք է դա այնպես անենք, որ պաշտպանենք տնտեսության վերականգնումը, ներդրումները, որոնք մեզ անհրաժեշտ են աճի համար, ստեղծենք աշխատատեղեր և ապահովենք մեր ապագան»,- ասել է Օբաման:
Այս միջոցառումներն իրականացնելու համար անհրաժեշտ է ինչպես ծախսերի կրճատում, այնպես էլ հարկերի բարձրացում, այդ թվում` հարուստների համար ցածր հարկերի վերացում: Կրճատման ենթակա 4 տրլն դոլարից 2 տրլն-ը բաժին կընկնի ծախսերի նվազեցմանը, 1 տրլն-ը` հարկերի բարձրացմանը, 1 տրլն-ը` արտաքին պարտքի սպասարկման կրճատմանը:
Այս տարի ԱՄՆ բյուջեի դեֆիցիտը կկազմի ռեկորդային 1.6 տրլն, որը 2011 թ. Համախառն ներքին արդյունքի մոտ 11%-ն է: Սակայն հաջորդ տարվա բյուջեում այդ թիվը զգալիորեն կկրճատվի և կկազմի 1.1 տրլն դոլար: