Մայրաքաղաքի բանուկ փողոցներում Վերջին զանգի մեքենաները շարունակում են պտտվել և անհարկի ազդանշան միացնել: Մեքենաներից շատերից շրջանավարտները կիսով չափ դուրս եկած են, կան նաև մեքենաներ, որոնց ղեկին անչափահասներ են: Ճանապարհային ոստիկանությունը այսօր իրականացնում է ուժեղացված ծառայություն: Բազմաթիվ մեքենաներ տարվում են նաև տուգանային հրապարակ:
«Առաջին լրատվական»-ի հետ զրույցում ՃՈ առաջին սպայական գումարտակի ավագ տեսուչ, ոստիկանության կապիտան Հայկ Դավթյանը նշեց, որ ինչպես նախորդ տարի, այս տարի ևս Ճանապարհային ոստիկանությունը նախապատրաստական աշխատանքն ավելի շուտ է սկսել: Շրջանավարտների, նրանց ծնողների և ուսուցիչների հետ հանդիպումներ են կազմակերպվել Երևանի ավագ դպրոցներում և մարզերում։
«Չնայած սրան՝ դեռ կան ծնողներ, շրջանավարտներ, որոնք անտեսում են հորդորները. ինչ արվում է՝ շրջանավարտների համար է արվում, որպեսզի առանց միջադեպերի կարողանան տոնել»,- նշեց նա:
Ըստ Հայկ Դավթյանի՝ տարեցտարի Վերջին զանգի օրերին իրավախախտումները նվազում են՝ հատկապես ղեկին անչափահաս լինելու մասով. «Ծնողները չեն վստահում, բացի այդ՝ ունենք շրջանավարտներ, որոնք չափահաս են, տարեցտարի այդպիսի շրջանավարտների թիվն ավելանալու է»,- ասաց նա:
ՃՈ-ի հետ շրջելիս տեսանք, որ հիմնականում իրավախախտումներ էին կատարում շքեղ մեքենաներ վարողներն ու դրանց մեջ գտնվող շրջանավարտները: Նրանցից շատերը փորձում էին զանգեր կատարել, ծանոթների անուններ նշել, որ չտուգանվեն, կամ իրենց մեքենան տուգանային հրապարակ չտարվի, սակայն բանակցությունները անօգուտ էին:
Մանրամասները՝ տեսանյութում։