«Ես չեմ բացառում վարկածը, որ կրակոցները կարող էին կազմակերպված լինել հենց իրենց կողմից, բայց միևնույն ժամանակ ուզում եմ ասել, որ անպատժելիությունը երկրում բերում է կամ հպատակության, կամ վենդետայի: Ու եթե երկրում վենդետա է իրականացվում, ապա այդ երկրում արդարադատությունը չի գործում»,- այսօր «Առաջին լրատվական»-ի հետ զրույցում ասաց իրավապաշտպան Ավետիք Իշխանյանը՝ անդրադառնալով երեկ Սյունիքի մարզպետ Սուրիկ Խաչատրյանի մեքենայի վրա արձակված կրակոցներին:
Հարցին՝ որքանո՞վ է հավանական վարկածը, որ կատարվածը վենդետա է, եթե 10 րոպե շարունակ արձակված 25-30 կրակոցից ոչ մեկը ոչ ոքի չի դիպել, իրավապաշտպանը նկատեց. «Պարտադիր չէ, որ վենդետա կատարողը լինի պրոֆեսիոնալ, և հետո՝ նույնիսկ պրոֆեսիոնալ կրակողներն են հաճախ վրիպում»:
Իշխանյանի խոսքով՝ ովքեր մտածում են, որ հայ ժողովուրդն ի վիճակի չէ վենդետա իրականացնել, ուրեմն նրանք համարում են, որ հայ ժողովուրդը լրիվ հպատակ է դարձել:
Ինչ վերաբերում է Սուրիկ Խաչատրյանի որդու մասնակցությամբ մայիսի 2-ին կատարված միջադեպին, որի ժամանակ Հարութ Զաքարյանը կորցրել է տեսողությունը, ապա իրավապաշտպանի խոսքով՝ ինքը համոզված է, որ Սուրիկ Խաչատրյանի որդին չի պատժվի, կամ էլ ձևական պատիժ կլինի: «Ես համոզված եմ, որ նա չի պատժվի, իսկ եթե պատժվի, ապա ես պատրաստ եմ հրապարակավ ներողություն խնդրել իմ խոսքերի համար»,- եզրափակեց իրավապաշտպանը: