Երևում է՝ Թուրքիան Ռուսաստանից լրջորեն նեղացել է՝ կապված Հայոց ցեղասպանության հարցում նրա դիրքորոշման հետ. ոչ բարեկամական հայտարարությունները, այդ թվում՝ Ղրիմի վերաբերյալ, հաջորդում են մեկը մյուսին: Իսկապե՞ս երկու երկրների հարաբերություններում սառնություն է առաջանում, և դա կազդի՞ Ռուսաստանի համար սկզբունքային «Թուրքական հոսք» նախագծի վրա: Այս մասին գրում է «Վզգլյադ» առցանց պարբերականը:
Պարբերականը հիշեցնում է, որ Թուրքիայի ԱԳՆ ղեկավար Մևլութ Չավուշօղլուն հինգշաբթի օրը հայտարարել է, որ Ղրիմում եղած ոչ պաշտոնական թուրքական պատվիրակությունը մարդու իրավունքների խախտումների նշաններ է գտել:
«Հատկապես ղրիմցի թաթարների վրա շարունակվում է ճնշում գործադրվել»,- հայտարարել է Չավուշօղլուն:
Չավուշօղլուի արած եզրակացությունները տարօրինակ են երևում՝ հաշվի առնելով հենց Ղրիմում եղած թուրքական պատվիրակության անդամների հայտարարությունները, որոնք հայտարարել են, որ գոհ են մնացել թերակղզում թաթարների վիճակից՝ գրում է պարբերականը՝ հղում անելով RIA Novosti-ին:
Նախօրեին թուրք ղեկավարների շուրթերից ավելի կտրուկ հայտարարություններ են հնչել՝ նշում է պարբերականը: «Ղրիմի անօրինական բռնակցումը չի կարող ոչ մի կերպ ճանաչվել»,- ՆԱՏՕ-ի անդամ երկրների ԱԳՆ ղեկավարների հանդիպման ժամանակ Թուրքիայի վարչապետ Ահմեդ Դավութօղլուի արած հայտարարությունն է հիշեցնում պարբերականը:
Թուրքիայի ԱԳՆ ղեկավար Մևլութ Չավուշօղլուն հայտարարել է, որ Թուրքիան հանդես է գալիս ՆԱՏՕ-ին Վրաստանի անդամակցության օգտին:
Ակնհայտ է, որ Անկարայի հակառուսական հայտարարությունները հետևել են անմիջապես Հայոց ցեղասպանության 100-րդ տարելիցին Ռուսաստանի նախագահ Վլադիմիր Պուտինի՝ Երևան այցին՝ ասվում է հոդվածում:
Անկարայի և Մոսկվայի հարաբերությունների վատացումը (համենայնդեպս՝ հռետորության մակարդակով) հակասում է երկու երկրների շարունակվող և խորացող տնտեսական համագործակցությանը, առաջին հերթին՝ էներգետիկ ոլորտում՝ նշում է պարբերականը: