«Իսլամական պետություն» խմբավորման ղեկավարը Թուրքիայի նախագահ Ռեջեփ Թայիփ Էրդողանին աջակցություն է ցուցաբերել Հայոց ցեղասպանության ճանաչման դեմ պայքարում և շնորհակալություն հայտնել՝ «օրինակ լինելու» համար: Նման տեղեկություն է տարածում ենթադրաբար իսրայելական IsraeliDaily լրատվակայքը՝ չնշելով կասկածելի տեղեկության աղբյուրը:
Ըստ աղբյուրի՝ ԻՊ-ի ղեկավար Աբու Բաքր ալ-Բաղդատին նամակով է դիմել Թուրքիայի ղեկավարին՝ նշելով, թե «Թուրքիան օրինակ է իրենց համար»:
«Ձեր ժողովուրդը ցույց է տվել ջիհադիստների տարբեր սերունդների, թե ինչպես կարելի է հաղթել խաչակիրների բանակներին: Շնորհակալություն»,-նշված է Աբու Բաքր ալ-Բաղդատիի հայտարարությունում:
Նույն աղբյուրը նաև նշում է, թե Էրդողանն արդեն իբր պատասխանել է այս նամակին հեռուստաեթերում, որում «շնորհակալություն է հայտնել ԻՊ-ին՝ աջակցության համար»: Այնուամենայնիվ, վերջին օրերին Էրդողանի մասնակցությամբ նման բովանդակության հրապարակային հայտարարություն չի եղել: Եվ ընդհանրապես, պետք է արձանագրել, որ Էրդողանն ԻՊ-ին վերաբերող թեմաներում օգտագործում է կազմակերպության դեմ ուղղված ընդգծված թշնամական և խիստ բացասական հռետորաբանություն:
Շեշտենք, որ թուրքական լրատվամիջոցներում էլ այս տեղեկության մասին որևէ հիշատակում դեռ չկա:
