Սասունի, Բիթլիսի, Մուշի, Վանի և Ստամբուլի հայերի սոցիալական օգնության, համերաշխության մշակութային միության ղեկավար Ազիզ Դաղջըն թուրքական կողմին կոչ է անում վերանորոգել Սասունի Գոմք եկեղեցին, ինչն օգտակար կլինի նաև տեղի բնակիչների համար: Այս մասին տեղեկացնում է թուրքական պետական «Անադոլու» լրատվական գործակալությունը:
Դաղջըն նշել է, որ ներկայում իրենք փորձում են վերականգնել հայկական եկեղեցին, ինչի ավարտից հետո մեծ թվով հայեր են այցելելու սրբավայր:
«Եթե հայկական եկեղեցին վերանորոգվի, ապա հազարավոր մարդիկ Եվրոպայից և Ամերիկայից կայցելեն այս վայրը: Անգամ Փարիզին հնարավոր է անցնել, եթե այդպես ստացվի: Այս ամենից շահելու են Բաթմանի բնակիչները (Սասունը.- խմբ.), շահելու են հյուրանոցների տերերը, վարորդները: Մենք էլ, այստեղ գալով, կտեսնենք մեր հին մուսուլման բարեկամներին»,- հայտարարել է Թուրքիայում գործող հայկական կազմակերպության ղեկավարը:
Վերջինս հրաժարվել է մեկնաբանել նաև Հռոմի պապ Ֆրանցիսկոսի մատուցած պատարագը, որի ժամանակ վերջինս 20-րդ դարասկզբի իրադարձությունը ներկայացրել էր որպես Հայոց ցեղասպանություն: «Այս հարցում մեկնաբանություն չեմ անի, ճիշտ չի լինի»,- նշել է Դաղջըն:
Նշենք, որ Գոմքը գյուղն ու համանուն եկեղեցին Սասունի Տալվորիկ շրջանում են: Եկեղեցին կառուցվել է 14-րդ դարում: Հայոց ցեղասպանության տարիներին հայկական եկեղեցու մոտ հայերը դիմադրություն են ցույց տվել: Այժմ եկեղեցին կիսականգուն վիճակում է և վերականգնման կարիք ունի:
Թուրքիայում որոշ հայկական եկեղեցիներ վերանորոգվում են, ինչի արդյունքում շահում է տեղի զբոսաշրջությունը: Այնուամենայնիվ, գոնե այս կերպ հնարավոր է լինում վերջնական ոչնչացումից փրկել ներկայիս Թուրքիայի տարածքում հայկական պատմամշակութային ժառանգությունը: