Դեռևս օրեր առաջ Հրազդանի Միկրոշրջան թաղամասի հանրակացարանի բնակարաններից մեկում դաժան ծեծի էր ենթարկվել տարեց բնակչուհին, ով տեղափոխվել էր հիվանդանոց և ի վիճակի չէր անգամ խոսելու: Նույն օրը կնոջը ծեծի ենթարկելու կասկածանքով ոստիկանություն բերման էր ենթարկվել որդին, ով, հարևանների պնդմամբ, հարբած վիճակում վիճաբանել էր մոր հետ, ապա դաժան ծեծի ենթարկել:
«Առաջին լրատվական»-ը քիչ առաջ տեղեկացավ, որ 70-ամյա թոշակառուն մահացել է: Իսկ թե որն է նրա մահվան իրական պատճառը՝ հայտնի կլինի դատաբժշկական փորձաքննության եզրակացությունից հետո:
Ի դեպ, «Առաջին լրատվական»-ին հաջողվեց պարզել, որ ապրիլի 27-ի միջադեպից ամիսներ առաջ 47-ամյա տղամարդը մորը խոշտանգելու համար կրկին ոստիկանություն է տարվել, դատական գործընթաց էր սկսվել և 3.5 տարվա ազատազրկման վճիռ կայացվել, որն այսօր ուժի մեջ է մտել: Այսինքն՝ մինչ կբացահայտվի մոր մահվան իրական հանգամանքները, որդին արդեն մորը խոշտանգելու նախկին միջադեպով դատական գործընթացի մեջ էր:
