Հայաստանն ու ԱՄՆ-ն այս շաբաթ ՀՀ նախագահ Սերժ Սարգսյանի՝ Վաշինգտոն այցի ընթացքում երկկողմ առևտրի ու ներդրումների մասին շրջանակային համաձայնագիր կստորագրեն։ Այս մասին հայտնում է Asbarez-ը՝ հղում անելով Հայաստանում ԱՄՆ դեսպան Ռիչարդ Միլսին։
Մամլո ասուլիսի ժամանակ նա հայտարարել է, որ գործարքը կընձեռի երկու երկրների միջև առևտրի և բիզնեսի ավելի շատ հնարավորություններ։
Համաձայն Հայաստանի կառավարության վիճակագրության՝ ԱՄՆ-ն անցած տարի ապահովել է Հայաստանի արտաքին առևտրի 4 տոկոսից քիչ մասը։
«Կարող եմ վստահեցնել, որ Հայաստանի ու ԱՄՆ-ի հարաբերությունները շատ ուժեղ են,- ասել է Միլսն ու հավելել։- Նախագահ Օբաման կարծում է, որ այս հարաբերությունները շատ կարևոր են»։
Հայ դատի հանձնախմբի նախագահ Քեն Հաչիկյանը ստորագրումը խրախուսելու նպատակով ԱՄՆ առևտրային ներկայացուցիչ Մայքլ Ֆրոմանին ուղղված նամակում նշել է համաձայնագրի օգուտները, որոնցից ամենակարևորներն են ներդրումային կլիմայի բարելավումը, տարածաշրջանային առևտրի աջակցումը, այդ թվում՝ հատուկ դժվարությունների պայմաններում, որոնց Հայաստանը բախվում է Թուրքիայի և Ադրբեջանի սահմանների շրջափակման պատճառով։