Կենտրոն և Նորք-Մարաշ վարչական շրջանների ընդհանուր իրավասության դատարանում Մեսրոպ Մակյանի նախագահությամբ ավարտվեց Գագիկ Ավագյանի գործի դատական քննությունը:
Ըստ մեղադրանքի՝ 35-ամյա Գագիկը 2015 թվականի փետրվարի 25-ին, ժամը 18-ի սահմաններում թակել է հայտնի օպերային երգչուհի Հասմիկ Հացագործյանի բնակարանի դուռը, ներկայացել է որպես թաղապետարանի աշխատակից ու բնակարանի պատուհանները չափագրելու պատրվակով խաբեությամբ մուտք է գործել բնակարան:
Սենյակում Գագիկը տանտիրուհուց մի բաժակ ջուր է խնդրել: Այդ սենյակում է եղել նաև տանտիրուհու տարեց ու վատառողջ քեռին: Մինչ երգչուհին գնացել է խոհանոց՝ «թաղապետարանի աշխատողի» համար ջուր բերելու, Գագիկը շուրջն է նայել, վերցրել է մի արծաթե շաքարաման ու դուրս է փախել:
Գագիկը շուտով հայտնաբերվել է: Նա ներկայացրել է նաև հափշտակած շաքարամանը, որն արծաթից է եղել, ոսկեջրած ու, որպես արժեքավոր հնաոճ իր, ենթարկվելով դատաապրանքագիտական ու մշակութաբանական փորձաքննության, գնահատվել է… 2 միլիոն դրամ:
Քանի որ Գագիկը այդ բարձրարժեք շաքարամանը հափշտակել էր բացահայտ՝ տանտիրուհու տարեց բարեկամի ներկայությամբ, նրա արարքը որակվել է որպես կողոպուտ՝ ՀՀ քրեական օրենսգրքի176 հոդվածի 3-րդ մասի 1.1 կետով:
Գագիկ Ավագյանը ինչպես նախաքննության ընթացքում, այնպես էլ դատարանում իրեն մեղավոր է ճանաչել:
Տուժող Հասմիկ Հացագործյանը ամբաստանյալին որևէ պահանջ չի ներկայացրել, ինչպես նաև դիմել է դատարանին՝ նիստերը իր բացակայությամբ անցկացնելու խնդրանքով:
Գագիկ Ավագյանը հափշտակած անտիկվար շաքարամանը բռնվելուց հետո վերադարձրել էր, շաքարամանը ճանաչվել էր որպես իրեղեն ապացույց, փաթեթավորվել ու կցվել էր քրեական գործին: Իսկ դատավճռով որոշվեց շաքարամանը վերադարձնել տուժող Հացագործյանին:
Հանցանքի կատարման պահին Գագիկ Ավագյանը եղել էր պայմանական դատապարտության փորձաշրջանի մեջ: Ավելի վաղ նա դատապարտվել էր ապօրինի կերպով պատժամահակ՝ «դուբինկա» կրելու համար, նրա նկատմամբ կիրառվել էր պայմանական դատապարտություն, սահմանվել էր փորձաշրջան: Իսկ քանի որ փորձաշրջանի ընթացքում Գագիկը նոր հանցանք էր գործել, նոր դատավճռով նրա նկատմամբ նախկինում կիրառված պայմանական դատապարտությունը հանվեց, իսկ չկրած պատիժը մասնակիորեն գումարվեց նոր նշանակվող պատժին:
Մեղադրողը միջնորդել էր Գագիկ Ավագյանին, նախկին պատժի չկրած մասի գումարմամբ, դատապարտել 6 տարի 9 ամիս ազատազրկման:
Մինչ դատարանը խորհրդակցական սենյակում էր, դատարանի միջանցքում սպասումից և ապրումներից վատացավ ամբաստանյալի մայրը, ով հիվանդ է էպիլեպսիայով: Դատարանի կարգադրիչների օպերատիվ գործողությունների և անմիջապես ժամանած շտապօգնության անձնակազմի ջանքերով հիվանդի նոպան կանխվեց: Հիվանդ կնոջը խորհուրդ չտվեցին ներկա լինել որդու դատավճռի հրապարակմանը, իսկ նա անընդհատ կրկնում էր՝ գնամ, նայեմ տղայիս աչքերին, մի անգամ էլ տեսնեմ…
Տղան՝ 35 տարեկան, արտաքուստ՝ առողջ, հանդարտ տեսքով երիտասարդ տղամարդը, հիվանդ մորը թիկունք լինելու, նրան հոգ տանելու փոխարեն անհեթեթ արարքի համար, որը իրավական գնահատմամբ թեթև հանցարարք չէ, ուր որ է՝ ստանալու էր իրական պատժաչափ…
Նախագահող դատավորը, որ անցած նիստի ժամանակ արդեն տեսել էր ամբաստանյալի մոր վիճակը, միգուցե այդ հանգամանքը նույնպես հաշվի առնելով, Գագիկ Ավագյանին մեղավոր ճանաչեց մեղսագրված արարքի՝ կողոպուտի համար՝ ՀՀ քրեական օրենսգրքի 176 հոդվածի 3-րդ մասի 1.1 կետով, և դատապարտեց 4 տարի 6 ամիս ազատազրկման: Նախկին պատժի չկրած մասից այս պատժին գումարեց ընդամենը 1 ամիսը և որպես վերջնական պատիժ՝ նշանակեց 4 տարի 7 ամիս ազատազրկում: Մեղադրողի միջնորդած պատժաչափի համեմատ սա ավելի մարդասիրական էր: Մնում է, որ 35 տարեկան ամբաստանյալը կատարի համապատասխան հետևությունները՝ իր հետագա կյանքի վերաբերյալ…