Տարբեր գերատեսչությունների պետական ծառայողներ արդեն դժգոհում են, որ սոցփաթեթների համար հատկացված գումարները չեն փոխանցվում իրենց հաշիվներին կամ փոխանցվում են ուշացումով, ինչից նրանք եզրակացնում են, որ այս տարի հնարավոր է խնդրի առաջ կանգնեն: Որոշներն էլ մեզ հետ զրույցում հետևություն էին անում, որ առկա սոցիալական ճգնաժամի պատճառով հնարավոր է ընդհանրապես էլ չփոխանցվեն:
«Դե էս երկրում մի տեսակ ճոխություն է էդ փաթեթները մեզ համար: Հնարավոր է` համարեն, որ այդ հանգիստը, որին փաթեթների հաշվին մեկնում ենք ամռանը, ճոխություն է մեզ համար, դրա համար էլ ձգձգում են»,- մեզ հետ զրույցում նկատեց երևանյան դպրոցներից մեկի ուսուցչուհին:
Հիշեցնենք, որ պետությունը պետական ծառայողներին հատկացնում է 72 հազար դրամ արժողությամբ սոցիալական փաթեթ հանգստի և այլ ծառայությունների համար: Իսկ այս տարի մեկ այլ նորամուծություն է եղել: Սոցփաթեթի գումարով հնարավոր է նաև հիփոթեքային վարկերը մարել: 72 հազարը բաշխված է 12 ամսվա մեջ: Յուրաքանչյուր ամիս շահառուի հաշվին է փոխանցվում 6 հազար դրամ:
Ուշագրավ է, սակայն, որ դրան զուգահեռ Հայաստանում պետծառայողներից շատ քչերն են օգտվում սոցփաթեթի ընձեռած հնարավորություններից, ինչը հնարավոր չէ ասել առողջապահական փաթեթի շահառուների դեպքում: Պետծառայողներից շատերը նախընտրում են այս կամ այն կերպ սոցփաթեթի գումարը կանխիկացնել և օգտագործել այլ ճանապարհով, քան հանգստի մեկնել կամ օգտվել փաթեթով նախատեսված այլ ծառայությունից:
Իսկ քանի որ օրենքը հնարավորություն չի տալիս սոցփաթեթի գումարը կանխիկացնել, մարդիկ այդուամենայնիվ ելքեր գտել են: Կան բավական ճարպիկ մարդիկ, ովքեր պետծառայողներից հավաքում են փաթեթները, դրանք 40-45 հազար դրամով վաճառում են տուրիստական կազմակերպություններին ու գումարը վերադարձնում փաթեթի տիրոջը՝ բնականաբար իրենք ևս գումար են աշխատում: Ընդ որում` ամեն ինչ կատարվում է օրինական: Սոցփաթեթի շահառուն ստորագրում է, որ ինքը հրաժարվում է ծառայությունից և համաձայն է, որ այն գնի տուրիստական գործակալությունը: Հասկանալի է նաև, որ տուրիստական կազմակերպությունն էլ այն ավելի բարձր գնով վաճառում է իր հաճախորդներին:
«Չնայած սոցփաթեթի վաճառքից ամբողջ գումարի կեսի չափ գումար է կանգնում, բայց դե ինչ արած: Գոնե դրանով ինչ-որ մի խնդիր լուծում եմ: Մենք հիմա այնպիսի երկրում չենք ապրում, որ կարողանանք մեզ նման ճոխություն թույլ տալ և գնալ հանգստանալու, թեկուզ Հանրապետության ներսում»,- մեզ հետ զրույցում ասաց մեկ այլ ուսուցչուհի, ով պատրաստվում էր այս տարվա փաթեթն էլ վաճառել:
Պետական գերատեսչություններում այս խնդիրներին գուցե տեղյակ են, բայց դա նրանց առանձնապես չի էլ հետաքրքրում: Իրենցից հասնում է գումարը փոխանցել, փոխանցել ժամանակին, իսկ թե շահառուն ինչպես կվարվի իր գումարների հետ, արդեն շահառուի խնդիրն է: Ինչ վերաբերում է գումարների ուշացմանը կամ չփոխանցելուն, ապա Աշխատանքի և սոցիալական հարցերի նախարարությունից մեզ փոխանցեցին, որ տարբեր գերատեսչությունների պետծառայողների գումարները տարբեր ժամանակներում են փոխանցվում, բայց փոխանցվում են: «Ամեն մի կառույց իր աշխատողների համար առանձին է գումարը փոխանցում, բայց վստահ եմ, որ ամեն ամիս այդ գումարը գերատեսչությունը փոխանցում է պետական ծառայողի սոցփաթեթի համար բացված հաշվեհամարին, որտեղից էլ բանկն այդ գումարը փոխանցում է այն ծառայությանը, որից օգտվել է քաղաքացին»,- ասաց նախարարության Աշխատավարձի քաղաքականության բաժնի պետ Արմինե Մաթոսյանը՝ հավելելով, որ եթե գումարների ուշացումներ եղել են, ապա քաղաքացին կարող է դիմում գրել պատկան մարմնին, և գումարը կփոխանցվի: «Այդ գումարները պարտադիր փոխանցվող գումարներ են, և ուշացումները զուտ տեխնիկական բնույթ կարող են կրել»,- ասաց նա:
Հիշեցնենք, որ Հայաստանում սոցիալական փաթեթը ներդրվեց 2012թ. հունվարից, որը նախատեսված է քաղաքացիական և պետական ծառայողների, պետական պաշտոններ զբաղեցնող անձանց, ինչպես նաև կրթության, մշակույթի և սոցիալական պաշտպանության ոլորտների պետական կազմակերպությունների վարչական և մասնագիտական պաշտոններ զբաղեցնողների համար: Այն հնարավորություն է ընձեռում շուրջ 120 հազար աշխատակիցների և նրանց ընտանիքի անմիջական անդամներին (ամուսինը և մինչև 27 տարեկան չամուսնացած զավակները), անկախ զբաղեցրած պաշտոնից և վարձատրության չափից, հավասարաչափ օգտվել: