«Մուսուլման եղբայրներ» իսլամիստական շարժման հոգևոր պետերից շեյխ Յուսուֆ Ալ-Քարատավին հայտնել է, թե չեն ընդունում 1,5 միլիոն հայերի սպանության իրողությունը և զորակցում են Հայոց ցեղասպանության նկատմամբ թուրքական ժխտողականությանը:
Շուրջ 60 միլիոն հեռուստադիտող ունեցող ալիքի կրոնական մի հաղորդման ընթացքում մուսուլմանական ծայրահեղական խմբավորման առաջնորդը հայտարարել է. «Հետզհետե ավելի կեղտոտ քարոզչական մի արշավով որոշ երկրներ ճնշում են գործադրում Թուրքիայի վրա, որպեսզի այն ստանձնի իբրև թե 1915-ին իրականացված ցեղասպանության պատասխանատվությունը»։
Քարատավին նաև հայտարարել է, թե կատարվածը պատմությունը խեղաթյուրելու փորձ է, թե չափազանցվում է 1915-ի դեպքերի ընթացքում հայ զոհերի թիվը, այնինչ նվազեցվում է զոհված օսմանցիների թիվը, և հավելել, թե նրանք, ովքեր Թուրքիայի կողքին են, չպիտի տեղի տան նման արշավներին:
Թերևս ավելորդ չէ նշել, որ զարմանալի ոչինչ չկա Ալ-Քարատավիի վերոնշյալ կեցվածքի մեջ՝ նախևառաջ կրոնական, բայց նաև հատկապես քաղաքական գործոնների առումով, քանի որ Եգիպտոսի ներքաքաքական հաշվեհարդարների ընթացքում Անկարան եղավ և դրանից հետո էլ «Մուսուլման եղբայրների» ամենաթունդ դաշնակիցն է ու պաշտպանը: Էրդողանը՝ որպես ներկայիս Թուրքիայի նախագահ և այն ժամանակի վարչապետ, հրապարակավ քանիցս և ինչպիսի՜ արտահայտություններով է պարսավել Եգիպտոսի ռազմական հարվածի հեղինակներին, մասնավորապես, օրինակ, Ալ-Սիսիին, և Թուրքիայի աներկբա զորակցությունն է հայտնել «Մուսուլման եղբայրներին»:
