Թուրքիայում հայտնի հայ գրող Մկրտիչ Մարկոսյանը, ով մասնակցել է իր գրքի հիման վրա ստեղծված ֆիլմի շնորհանդեսին, հայտարարել է, թե «1915-ի դեպքերը ցեղասպանություն չեն»: Նման տեղեկություն է տարածել թուրքական «Իհլաս» լրատվական գործակալությունը:
Շնորհանդեսը կայացել է օրերս Ստամբուլի Շիշլիի քաղաքապետարանում: Միջոցառմանը ներկա են եղել արվեստի գործիչներ, մեծ թվով հյուրեր: Միջոցառման ժամանակ Մարկոսյանը զրուցել է լրատվամիջոցների ներկայացուցիչների հետ:
«Ես երբեք 1915-ի դեպքերը չեմ որակել որպես ցեղասպանություն: Ավելի շուտ կոչել եմ այն «շարասյուներ», երբ մարդիկ խմբերով անհայտ ուղղությամբ են ուղարկվել: Նրանց մեջ իմ ազգականներն էլ են եղել»,- ըստ թուրքական աղբյուրի՝ նշել է հայ գրողը:
Նշենք, որ Մարկոսյանը, ով Թուրքիայում հայտնի գրող է, Դիարբեքիրից է: Նրա «Գյավուրի թաղը» գիրքը բավական մեծ աղմուկ էր բարձրացրել ու ուշադրություն գրավել: Այդ գիրքի հիման վրա էլ նկարահանվել է այն ֆիլմը, որի շնորհանդեսն օրերս կայացել է Ստամբուլում: