Լուրեր
Գազի գինը կնվազի «Գազպրոմ-Արմենիա»-ի համար, այլ ոչ թե սպառողի
  • 10:12
  • 2015-04-30
  • Դիտումներ՝ *

Ազգային ժողովի տնտեսական հարցերի մշտական հանձնաժողովի նախագահ Վարդան Այվազյանը համարում է, որ դոլարի արժևորման պատճառով «Գազպրոմ-Արմենիա» ընկերության եկամուտները պակասում են: Գազի գործող սակագինը հաստատվել է մեկ դոլարը 409 դրամ փոխարժեքի պայմաններում, բայց այսօր այդ գինը հասել է 480 դրամի:

Սպառած գազի համար դրամով վճարում են տարեկան մինչև 10.000 խորանարդ մետր գազ սպառող բաժանորդները, այսինքն` հիմնականում շարքային քաղաքացիները: 10.000 խմ-ից ավելի գազ սպառողները վճարում են դոլարով:

Վ.Այվազյանի խոսքերով` դոլարի արժևորման արդյունքում Հայաստանում գազի միջին սակագինը 312 դոլարից դարձել է 209 դոլար` 1000 խմ-ի համար: Իսկ շարքային քաղաքացիներին վաճառվող գազի դոլարային արժեքը 381 դոլարից հասել է 326 դոլարի: Այսինքն` 55 դոլարով նվազել է: Եվ «Գազպրոմ» ընկերությունը, Հայաստանին մատակարարվող գազի գինը էժանացնելով, հավանաբար, ցանկանում է փոխհատուցել դոլարի արժևորման արդյունքում «Գազպրոմ-Արմենիա»-ի եկամուտների նվազումը:

Հիշեցնենք, որ երեկ ռուսական «Գազպրոմ» ընկերության նախագահ Ալեքսեյ Միլլերը հայտարարել էր, թե «Եվրասիական տնտեսական միություն` Հայաստանի մուտքով պայմանավորված` գազի սակագինը Հայաստանի համար կիջեցվի և կկազմի 165 դոլար` 1000 խմ-ի դիմաց: Նման սակագնի սահմանումը թույլ կտա նաև ներդրումներ կատարել գազամատակարարման համակարգի արդիականացման աշխատանքներում»: Ներկայումս 1000 խմ-ի համար Հայաստանը «Գազպրոմին» վճարում է 189 դոլար:

Վ.Այվազյանը չի կարծում, թե եթե ՌԴ-ն իջեցնի գազի գինը, ապա այն կարող է իջնել նաև Հայաստանում: Բայց, պատգամավորի կարծիքով, սոցիալական որոշակի խմբերի համար պետք է սահմանել գազի տարբեր գներ: Նա համարում է, որ պետք է ստեղծել նաև երրորդ խմբի սպառողներ, որոնք շատ ավելի քիչ գազ են սպառում: Եվ նրան նկատմամբ գնային մոտեցումը պետք է լինի` սոցիալական սկզբունքներից ելնելով:

  • Դիտումներ՝ *