Մոսկվայի «Սպարտակ»-ի և Հայաստանի ազգային հավաքականի կիսապաշտպան Արաս Օզբիլիսը հայտարարել է, որ թիմի գլխավոր մարզիչ Մուրատ Յակինը հեռացրել է իրեն հիմնական կազմից և ուղարկել երկրորդ թիմ, տեղեկացնում է Спорт-экспресс-ը:
25-ամյա ֆուտբոլիստը չի մասնակցել ընթացիկ մրցաշրջանի հանդիպումներին խաչաձև կապանների վնասվածքի պատճառով:
«Պաշտոնապես ես դեռ վնասվածք ունեմ: Բոլորն են այդպես կարծում, քանի որ ակումբն այդպես է հայտարարում: Իրականում ես ինձ շատ լավ եմ զգում և պատրաստ եմ հարյուր տոկոսով: Վերջին 5-6 շաբաթվա ընթացքում ես առաջընթաց չեմ գրանցել: Ինձ դա թույլ չեն տալիս:
Իմ վերջին մարզումը հիմնական կազմում ես անցկացրել եմ «Մորդովիա»-ի դեմ խաղից առաջ: Սարանսկում հաղթանակ գրանցելուց հետո մարզիչը որոշեց ֆուտբոլիստներին հանգիստ տրամադրել և ուղևորվեց Շվեյցարիա: Թիմում ոչ ոք չմնաց: Ինձ մի քանի հասարակ վարժություն են հանձնարարել և հայտարարել, որ ես պետք է մարզվեմ մարզադահլիճում:
Երբ մարզիչները վերադարձան, մեզ երկու մարզում էր սպասվում: Մարզվեցի ընդհանուր խմբում, իսկ հաջորդ օրը մկանային հոգնածություն զգացի: Ցավոք, հոգնածությունը նկատվեց առողջ ոտքի մոտ: Յակինին հաղորդեցի այդ մասին:
Ուրբաթ օրը Յակինը խոսեց բժիշկների և մարզիչների հետ և հայտարարեց, որ ես նորից պատրաստ չեմ: Ես ապշել էի կատարվածից: Յակինն ասում էր, որ նրան միայն առողջ ֆուտբոլիստներ են պետք:
Նա ինձ ասաց, որ չի պատրաստվում վնասվածք ունեցող ֆուտբոլիստների հետ մարզում անցկացնել: Բացի այդ, նա ինձ հեռացրեց հիմնական կազմից և ուղարկեց երկրորդ թիմ»,- հայտարարել է Օզբիլիսը:
