Հոլիվուդյան դերասանուհի Սալմա Հայեքը օգնության ձեռք է մեկնել կարիքավորներին: ՅՈՒՆԻՍԵՖ-ի բարեգործական ծրագրի շրջանակներում աստղը Լիբանանում հանդիպել է Սիրիայի փախստականներին, հաղորդում է rosbalt.ru-ն:
Սիրիայի զինված հակամարտության զոհեր են դարձել միլիոնավոր սիրիացիներ: Նրանցից շատերը ստիպված են օգնություն փնտրել հարևան պետություններում: 48-ամյա դերասանուհին հանդիպել է փախստականների ճամբարի երեխաներին, ինչպես նաև կամավորներին, բժշկական և կրթական կազմակերպությունների ներկայացուցիչներին:
«Միլիոնավոր երեխաներ զրկվել են մանկությունից, տնից և իրենց մտերիմներից,- ասել է Հայեքը պաշտոնական հայտարարության մեջ:- Արդյունքում նրանք առանց կրթության են մնացել: Նրանք ստիպված են աշխատել, որպեսզի օգնեն իրենց ընտանիքներին»: Դերասանուհին կոչ է արել բոլոր ոչ անտարբեր մարդկանց մասնակցել The Chime for Change բարեգործական արշավին և օգնել Սիրիայի երեխաներին:
