Քոնիայի՝ Նեջմեթթին Էրբաքանի անվան համալսարանում «Հայկական հարցը և պատմական իրողությունները» խորագրով հակահայ համաժողով է անցկացվել։ Այս մասին հայտնում է թուրքական «Հյուրիյեթ» պարբերականը։
Համալսարանի ռեկտոր Մուզաֆեր Շեքերը հայտարարել է, որ Առաջին աշխարհամարտի տարիներին տեղահանության ենթարկվածներից միայն 200 հազարն է մահացել՝ տարածված հիվանդությունների և այլ պատճառներով։ Մինչդեռ, ըստ նրա, այդ նույն ժամանակ ավելի քան մեկ միլիոն թուրք է զոհվել։
Համաժողովի մեկ այլ մասնակից, պրոֆեսոր Նուրի Քյոսթյուքլյուն ավելի հեռուն է գնացել ու հայտարարել է, թե իբր «1915 թվականին Վանում մեծ ապստամբության ժամանակ հայերը բազմաթիվ անմեղ թուրքերի են կոտորել, այդ թվում՝ կանանց ու երեխաների»։
Այս տարի թուրքական կողմն ակտիվացրել է Հայոց ցեղասպանության դեմ պայքարը տարբեր ճակատներում, այդ թվում և՝ գիտական ուղղությամբ: Թուրքիան տպում է Ցեղասպանությունը ժխտող բազմալեզու գիտական գրականություն, անցկացնում տեղական և միջազգային սեմինարներ ու գիտաժողովներ: Թուրքիան նաև ֆինանսավորում է միջազգային կարևորություն ունեցող համալսարաններում Ցեղասպանության փաստի ժխտմանն ուղղված քայլերը:
Բացի այդ, աշխարհի տարբեր երկրներում բնակվող թուրքերը նաև Անկարայի օժանդակությամբ կազմակերպում են հակահայ ակցիաներ, միջոցառումներ: