Աստղագետների միջազգային խումբը պատրաստել է Տիեզերքի՝ նեկայիս խոշորագույն եռաչափ քարտեզը, որի մեծությունը մոտ երկու մլրդ լուսային տարի է՝ երկարությամբ, բարձրությամբ և լայնությամբ: Քարտեզը հրապարակվել է Monthly Notices of the Royal Astronomical Society ամսագրում:
«Մենք պարզել ենք, որ Տիեզերքում գալակտիկաները չափազանց անհավասարաչափ և բավական պատահական են տեղաբաշխված, դրանց դասավորության մեջ չկա որևէ կաղապար կամ կայուն ուրվագիծ…»,- ասում է Մայքլ Հադսոնը Վաթեռլոյի համալսարանից:
Իրենց կազմած քարտեզը գիտնականներին անհրաժեշտ է մի քանի կարևոր բանի համար: Օրինակ՝ վերլուծելով գալակտիկաների դասավորությունը՝ գիտնականները փորձել են հասկանալ, թե Տիեզերքում ինչպես է բաշխված մուգ մատերիան: Բացի դրանից՝ եռաչափ քարտեզը տիեզերագետներին հնարավորություն է տալիս ստուգել Տիեզերքի ծնունդի և ձևավորման ընդհանուր ընդունված տեսությունները:
Նոր քարտեզի գլխավոր առավելությունն այն է, որ գիտնականներն իրենց մոդելում դուրս են գրել ու հաշվի առել շատ գալակտիկաների և դրանց կուտակումների շարժման արագությունները և ուղղությունները: Այդպիսի տվյալները չափազանց կարևոր են հետևելու համար, թե որքան արագ է արագանում Տիեզերքի ընդլայնումը և մի շարք տիեզերաբանական տեսությունների ստուգման համար:
